好多香港人都將去旅行視為「吊頸都要唞下氣」嘅活動。冇計，上班族實在太大壓力，放假想去街，四周圍都迫滿遊客，食飯睇戲都要排隊，真係想放鬆下都難。於是，我哋「逃離」香港，去吸收下其他國家嘅空氣，感受一下做遊客嘅滋味。但係香港養寵物，出遊就多咗顧慮⋯⋯
圖：電影截圖、新傳媒圖片庫
養寵物後 全家旅行不容易
屋企隻寵物就冇咁好福氣，好少人會帶埋寵物去旅行，如果自己同朋友或伴侶去旅行還好，可以交畀屋企人幫手。
但全家去旅行又點算呢？朋友最近就發生呢個問題，佢屋企養咗隻貓，怕寵物酒店信唔過，嘗試搵身邊嘅朋友幫手，但估唔到⋯⋯
不想被冠上壞主人之名 無奈取消計劃
只係一隻貓，四日三夜嘅行程，竟然收到以下嘅回覆：
「乜你出發之前唔諗下隻寵物點算咩？咁唔錫隻貓嘅。」
「你養寵物學咩人去旅行！」
「擺大兜啲糧啦，幾日唔會死嘅。」
朋友好愛錫自己隻貓，當佢親生仔一樣。最後，佢唔想被冠上「唔錫隻貓」嘅名義，冇將佢帶去寵物酒店暫住，屋企人又唔想畀陌生人上屋企，所以請唔到寵物保母。
最後⋯⋯朋友決定取消呢次家庭旅行嘅計劃。
主人不自律 受苦的是寵物
冇錯，養咗寵物好多地方需要考慮。如果養狗更加麻煩，因為香港好多地方都唔畀養狗，有部分主人亦唔自律，任得隻狗吠，出街大小便又唔處理好，最後受苦嘅都係隻寵物。
唔知點解，喺香港「養寵物」同「冇養寵物」兩批人好似站於兩個對立面上，覺得寵物好麻煩，唔想接觸佢哋。一講起養寵物嘅難處，就會有以下言論⋯⋯
「冇錢學咩人養寵物！」「香港根本唔適合養寵物！」「養得寵物就唔好怨啦！」
養寵物的文化差異 香港狗主如罪犯
點解外國同香港動物嘅待遇差咁遠？外國好多商場都會批准狗狗入去，帶狗出街亦係好平常嘅事。當然，做主人一定要識自律。但反觀香港，地方雖然好細，但真係細到連寵物都容納唔到咩？