海天一色的「天空之鏡」是不少人旅行想去的景點,最出名的玻利維亞天空之鏡就連藝人Elva Ni 倪晨曦亦特別取景拍攝婚紗照,婚紗照片以天空之鏡做背景,效果唯美。其實除了玻利維亞之外,香港、日本都可以影出「天空之鏡」的效果,不一定要大花金錢,今次就同大家數數全球最美的6個「天空之鏡」!

*影相前,謹記要愛護當地環境,不留下垃圾,影相之餘,都不要影響其他人!*

撰文:GOtrip編輯部

人生必去!6 個全球最美「天空之鏡」

天空之鏡
credit:misselvani

01|最就腳!香港街坊、文青打卡點!

做人目光放得遠係好,但有時自己地方都係寶!直接被網民稱為「Instagram pier」的西環碼頭,隨手在Ig搜索,都搵到巨量的攝影愛好者、文青、型人去影相打卡。要影到西環碼頭的「天空之鏡」效果,都要睇睇彩數。最好的時間是在雨後的黃昏,借地上不平的小窿,把相機貼近水平面,映照夕陽和彩霞拍攝,效果就最perfect!

就算冇雨,西環碼頭都有好多影相位,好似貨櫃碼頭、竹棚等;影唔到塊鏡,都唔會空手而回。但最近政府有意收回用地作其他發展,去影相之餘,也可以多留意這個地方的去向。

香港西環碼頭
前往方法:搭港鐵到香港大學站,B2出口步行約20分鐘

到達難度:★☆☆☆☆(搭港鐵都去到,冇難度可言啦!)
拍攝難度:★★★★☆(冇落雨的話,就冇鏡面效果。)

小貼士

日落時分,碼頭沒有車輛,可以放心影相;不過天黑後要分外小心,碼頭沒有圍欄,而且燈光較暗,不要為影相而變跳海!

02|動畫迷最愛!宮崎駿 feel 日版鏡面

唔使望到咁遠,有冇想像過,去一轉東京shopping 仲可以睇埋「天空之鏡」?再去埋三鷹嘅三鷹之森吉卜力美術館,簡直係dream 到上天堂啦!位於千葉縣木更津市嘅江川海岸被喻為隱世版「日本天空之鏡」,係日本龍友嘅私影熱點,除咗因為有塊「鏡」出名之外,當中的「海中電柱」都係地方名物!呢度有成排燈柱整齊地棟喺海中心,有眼利嘅日本網民發現和《千與千尋》的場景好相似。

倒轉看世界 天空之鏡 玻利維亞
圖片來源:matome.naver.jp

景色跟《千與千尋》的畫面非常相似!
景色跟《千與千尋》的畫面非常相似!

不過呢度睇鏡都唔容易,本刊記者採訪時,足足去咗5次先影到「天空之鏡」的效果!因為江川海岸會受潮汐漲退影響,潮退時,海岸3分1都一片乾塘,泥窪鬆散,不能再走遠海邊;潮漲時,水位不是稍稍漲高,而是變成汪洋大海。所以出發前,記得check定「江川漁業協同組合」官方網站,每年都會上載3至8月的潮退時間!

圖片來源:「江川漁業協同組合」官方網站

睇潮汐表,最好就在剛開始潮漲的黃金一小時影,仲要天清氣朗,冇風先影到無痕鏡面。幸運地夾到在日落時分來,成個畫面就會由藍色漸變到紅色,十分夢幻同有層次感!

等到黃昏可以影到藍變黃的景象。
等到黃昏,可以影到藍變黃的景象。

遇上天氣不好,都有另一番風味。
遇上天氣不好,都有另一番風味。

日本千葉縣木更津市江川海岸
前往方法:於JR「木更津」站西口對出,乘坐2號巴士,半小時可達;亦可選擇在JR「嚴根」駅坐的士,約15分鐘

到達難度:★★★☆☆(去程簡單,但若在日落後回程,須天黑黑行半粒鐘搭巴士或call 的士。)
拍攝難度:★★★★☆(潮水太深企唔到,太淺水鏡面又呈現泥坑!要由潮退等到潮水剛漲,仲要天晴兼冇風!)

小貼士
1. 根據潮水漲退時間,江川海岸每年約3月尾至8月開放,其餘時間均會掛上「Danger」警告牌。
2. 如果要影日落又唔想摸黑行半個小時出去搭巴士,記得要提前一個小時打回酒店請求幫手call 的士,否則就要摸黑步行半小時至巴士站!
3. 泥地上布滿刺腳的蜆殼,而且有時會泥足深陷。為安全同方便起見, 著番對水靴最穩陣!

03|日本爆紅!瀨戶內海絕景

除了去東京,如果你去四國的話,一樣可以去睇另一面「鏡」。近年日本爆紅的是位於有烏冬縣之稱,香川的父母濱海岸(父母ヶ浜)。

識擺甫士,同朋友整番個網陣!
識擺甫士,同朋友整番個網陣!

這個父母濱海岸位於三豊市,對外地人來講知名度不算高,但因為受日本網民力推為日版玻利維亞,人氣急升後,三豊市觀光交流局都為此刊出了日、中、英詳盡的介紹。官方網頁有齊交通、潮汐漲退同最佳拍攝日期和日落時間,勁細心,bookmark定就啱了!

最好的拍攝角度,蹲下來!
最好的拍攝角度,蹲下來!

父母濱海岸係一片沙灘,有長達1公里嘅海岸線。退潮時的父母濱海岸,就會出現獨特的潟湖。呢個時候,只要挑選一片較大面積的水池,蹲低身,在沒有風的情況下,就會拍出一面平靜如鏡的水面,完美倒映出天空。

圖片來源:三豊市觀光交流局
圖片來源:三豊市觀光交流局

用手機,校HDR,一樣影到。
用手機,校HDR,一樣影到。

要影到靚到窒息又呃like的相片,最佳拍攝時間係日落前後短短的半小時。鹹蛋黃徐徐落下當然係靚啦!加上一些浮雲,天堂一樣!但其實日落後的紫紅晚霞同橙紅餘暉,強烈嘅色彩對比就更加難忘。

日落時分,大家都揀定位置影相。
日落時分,大家都揀定位置影相。

現場仲有拍攝指導。
現場仲有拍攝指導。

想影到靚相,不妨帶點小道具,好似遮、風車都係好選擇。

冇帶道具,現場仲有得租,勁貼心!
冇帶道具,現場仲有得租,勁貼心!

日本香川縣三豊市仁尾町仁尾乙203‐3 父母ヶ浜海水浴場
前往方法: 由JR「松山」、「廣島」站坐到 JR「詫間」站,再轉乘「仁尾線」到父母ヶ浜,需時約25分鐘

到達難度:★★☆☆☆(同樣是去程簡單,但影完日落,尾班巴士已過,只能call 的士返JR站。)
拍攝難度:★★★☆☆(同樣有天氣因素影響,但觀光局網頁有晒建議最佳拍攝時間,方便好多!)

小貼士
1. 潟湖上的泥沼有好多寄居蟹,著水鞋、水靴就唔怕受傷。
2. 要注意父母濱至「詫間」站最後一班巴士是 6:49pm。 夏天日落時間較遲,拍攝完會錯過巴士,要自行call 的士。
3. 巴士星期日及假日休息!如不自駕又不搭的士者,記得留意!

04|海中秘景!馬來西亞黑沙灘

大部分「天空之鏡」都是湖或在近岸邊,但馬來西亞版本,卻竟是在海中心!話說在吉隆坡1個半小時車程外的瓜拉雪蘭莪州對開的馬六甲海,當地漁民發現每逢潮退,海中心會出現一片廣闊的沙地,水位只稍為蓋過沙洲,形成海天一色的鏡面。直到有攝影愛好者發現影低,呢個大馬「天空之鏡」先開始流傳。

圖片來源:malaysiatravel.info
圖片來源:malaysiatravel.info

圖片來源:malaysiatravel.info
圖片來源:malaysiatravel.info

去睇「天空之鏡」有不少條件,天晴冇刮大風外,還要夾啱農曆初一、十五,及其前後2、3天,趁潮退時才可睇到。但潮退時間日日唔同,船家都冇固定出發時間,要按日子而定。

圖片來源:Sky Mirror Tour & Travel Sdn Bhd@fb
圖片來源:Sky Mirror Tour & Travel Sdn Bhd@fb

由雪蘭莪河到碼頭,大約坐半個小時船,忽然見到一處海面出現深色地帶,和艇家確認後,小心翼翼行出去,原來係淺灘,就係傳說的「天空之鏡」。當地人推介,著淺色或鮮色衫影相最好睇,部分艇家仲會細心準備好小道具協助拍攝。

圖片來源:Sky Mirror Tour & Travel Sdn Bhd@fb
圖片來源:Sky Mirror Tour & Travel Sdn Bhd@fb

呢片淺灘都有近百個足球場大,但海水會不斷漲潮,所以記得聽實船家指示,拍攝時間大約有1小時。

圖片來源:Sky Mirror Tour & Travel Sdn Bhd@fb
圖片來源:Sky Mirror Tour & Travel Sdn Bhd@fb

馬來西亞瓜拉雪蘭莪沙沙蘭漁村海灘(Kuala Selangor,Sasaran Beach)
前往方法:最簡單的方法是參加local tour,包括「天空之鏡」拍攝及天鵝島採野生生蠔;或由吉隆坡到瓜拉雪蘭莪,再找艇家安排前往
當地旅行團:天空之鏡 Sky Mirror Tour & Travel Sdn Bhd

到達難度:★★★★☆(位置在海上,一定要請艇家帶你去或參加local tour。)
拍攝難度:★★★☆☆(要夾啱每個月農曆初一及十五前後,海水大退潮時,才會在海中央浮現出淺沙灘。)

小貼士
1. 淺灘有豐富的海洋生態,愛護環境,不要帶走泥灘上的任何海洋生物或貝殼。
2. 當淺灘出現時,為免傷害各類海洋生物,除避免踩死牠們外,也建議保持赤腳行走。

05|星空搭鹽湖!澳洲一樣有

去到南半球,澳洲都有著和玻利維亞相似的鹽湖「天空之鏡」。說的是距離墨爾本5小時車程的蒂勒爾湖(Lake Tyrrell),近兩年成為中國自助遊客的熱門旅遊點,令本來平靜的鄉郊小鎮受惠不少。

微博可見中國遊客勁hit 去鹽湖影相!
微博可見中國遊客勁hit 去鹽湖影相!

微博可見中國遊客勁hit 去鹽湖影相!
微博可見中國遊客勁hit 去鹽湖影相!

蒂勒爾鹽湖佔地逾兩萬公頃,一般的公共交通工具都不會去到,必須自駕前往。但只要夾著天晴冇風的天氣,整片鹽湖都會像一塊完美的鏡子,映襯著日落甚至星空。

圖片來源:Sea Lake Tyrrell@fb
圖片來源:Sea Lake Tyrrell@fb

有網民就試過去足3次先睇到「天空之鏡」的景色。總結大家的經驗,是要小心別揸車入泥沼,否則天大地大冇人幫到手,只能call 拖車;另外,鹽湖的面積大,大部分地方都是白雪雪的鹽,沒有水的話,就看不到鏡子;但部分地方又會水深似海又大風,所以搵唔搵到鏡面都要睇彩數。

圖片來源:Sea Lake Tyrrell
圖片來源:Sea Lake Tyrrell

圖片來源:Sea Lake Tyrrell
圖片來源:Sea Lake Tyrrell

圖片來源:Sea Lake Tyrrell
圖片來源:Sea Lake Tyrrell

澳洲星空出名靚,加上冇乜空氣污染,拍到鹽湖倒映星空的畫面就更出塵。

澳洲墨爾本蒂勒爾湖(Lake Tyrrell)
前往方法:距離墨爾本市區約5小時車程

到達難度:★★★★★(除自駕外,冇其他公共交通工具,而且路況不佳,很易迷路或陷入泥沼。)
拍攝難度:★★★☆☆(有指8-10月最佳,但只要下過大雨後,特別是澳洲的冬天時比較大機會,以日落前後最風平浪靜。)

小貼士
1. 這一帶土質鬆軟,自駕時盡量走大路,不要為抄捷徑而陷入泥沼,出事要call 拖車更煩。
2. 鹽湖的鹽刺腳,別赤腳走入湖中。

06|元祖級!玻利維亞最靚!

講到最靚的「天空之鏡」,都係「原裝版」玻利維亞的烏尤尼鹽湖( Salar de Uyuni)最無敵。位處海拔逾3,600米的鹽湖,足足有近十個香港大,是世界最大的鹽湖,成為世界各地旅人心目中的終極dream place。在這裡拍婚照也一定是個難忘的體驗。

天空之鏡
credit:misselvani

天空之鏡
credit:misselvani

玻利維亞的天空之鏡定必是不少旅人的終極 bucket list。
玻利維亞的「天空之鏡」定必是不少旅人的終極 bucket list。

這裡的「天空之鏡」勁在天堂感最高,周圍空曠冇建築物,大晴天來到,鏡面真的完美照出天空,視線完全不受阻。

猶如置身於天堂般!
猶如置身於天堂般!

一望無際的天空之鏡。
一望無際的「天空之鏡」。

不過要睇到「天空之鏡」當然不易,夾到盡在每年3-4月,雨季剛過時來到就最大機會看到。但只要一刮風,鹽湖有浪就影唔出鏡面,點都要睇運氣。

圖片來源:ericpare@Flickr
圖片來源:ericpare@Flickr

圖片來源:crossioly@Flickr
圖片來源:crossioly@Flickr

圖片來源:www.twowanderingsoles.com
圖片來源:www.twowanderingsoles.com

圖片來源:arcyandres425@Flickr
圖片來源:arcyandres425@Flickr

玻利維亞烏尤尼鹽湖 Salar de Uyuni
前往方法:參加local tour

到達難度:★★★★☆(香港飛最少35個鐘先到玻利維亞,仲要再坐車來到海拔逾3,600米的鹽湖,及一定要跟local tour。)
拍攝難度:★★★★☆(一年只有3-4月雨季過後最適宜;天氣方面晴天唔難,但要夾冇風,水位又不過高的地方都唔易。)

小貼士
1. 好消息係特區護照持有人終於可直接入境玻利維亞喇!詳情請睇:玻利維亞簽證最新措施|港人持特區護照 可辦落地簽證去天空之鏡!
2. 鹽湖海拔高,不要影相太興奮而忘形,盡量放慢活動,讓身體適應。

>>申請DBS Black Card輕鬆賺里數,享低至1蚊1里,獎賞達80,000里!申請網址

下一頁:必學影相小技巧!一齊換個角度 倒轉睇世界

【終極倒轉睇世界】6 個全球最美天空之鏡|香港、日本都有!