呢個世界有好多美食係我哋唔識㗎,Do姐同農夫嘅全新節目《Do姐有問題》裡面就安排咗問題特派員去到世界各地搜尋特別嘅飲食文化同美食俾大家睇,泰國篇就搵嚟有泰國通之稱嘅胡慧沖,景點起底王將會將第6~10集分爲泰國篇同台北篇續個景點介紹返。

撰文:尼克。泰國。流浪看 

01. 曼谷千層窩夫塔 影相呃like無難度

曼谷窩夫檔成行成市周街都係,商場夜市都可以見到有窩夫賣,但係有一間窩夫專門店,佢哋賣嘅係起碼十層嘅窩夫塔!


呢個窩夫塔每層都係金黃色熱辣辣嘅king size窩夫,配上糖漿、雪糕同士多啤梨,是咪好邪惡先?每個窩夫塔大概係700蚊港紙,但係10個人每人一層都未必食得晒啦,所以1人係70蚊左右。

不過因爲窩夫本身熱辣辣,上面嘅雪糕溶個塔就會冧㗎喇,所以大家影完相呃like之後,侍應哥哥就會即刻將個塔解體分俾大家

Hashme

地址:9:53 Community Mall, Bangkok, Thailand 10110 (顯示地圖)
電話:+66 2 662 4328
費用:十層窩夫塔約3000 泰銖
網址:https://www.facebook.com/hashmeofficial
前往方法:搭BTS到Thonglor站,Sukhumvit Soi 53直入步行約15分鐘。

 

02. 有「sss」你真係唔試?曼谷sss型甜品

泰國人創意無限就你知,我知,連單眼佬都知。呢度原本係一位甜品設計師嘅showroom嚟㗎,點知啲人經過見到都話好想試,就順理成章變成一間甜品店喇!

吉烈豬扒同西冷牛扒造型雪糕(各約40港幣)呢啲ok有創意嘅就唔講啦,嗚呀呢杯洗牙水飲品(20港幣)有棚像真度頗高仲可以食嘅假牙喺入面㗎…

阿沖哥個樣食到咁冧,你估佢食緊咩?係貓sss造型嘅甜品… 古語有云:「咁你都忍到,sss你都食到㗎啦!」

冇錯!真係有人sss造型甜品㗎,一嚿嚿啡色嘅… brownies就咁浮喺黃色嘅… 菠蘿啫喱上面… 真到格住個mon都打冷震呀…!究竟你會揀sss味甜品定甜品味嘅sss呢?呢個問題仲難過思考人生呀,不過有「sss」你真係唔試?sss型甜品袋住先啦廢青!

Icedea

地址:4rd Fl. Bangkok Art and Cultural Center. 939 Rama1 Road, Wangmai, Pathumwan, Bangkok, Thailand 10330 (顯示地圖)
電話:+66 8-98345950

營業時間:11:00~19:00 (週一休息)
費用:貓屎/人屎造型甜品 各185泰銖
網址:https://www.facebook.com/icedea
前往方法:搭BTS到National Stadium站,天橋直達(MBK商場對面)。

03. 唔使等四月尾… 曼谷蜘蛛仔

曼谷嘅Khao San路一直都係背囊友嘅天堂,一到咗傍晚時份就會非常熱鬧,買嘅食嘅都有,但係有啲嘢你未必敢食喎!

青蛙、蟲蟲、蟋蟀呢啲全部50泰銖一袋,而蠍子就貴少少,100銖一隻,沖哥仲一啖咬落去,話味道好似燶咗嘅薯條咁… 喂呀有必要連續兩個景點都咁重口味嗎?

咁都未算,最重口味嘅炸柬甫寨有毛蜘蛛都有… 仲要成500銖一隻㗎,加啲豉油同糊椒粉就食得㗎喇… 真係「食得」?

早幾日大家等到頸都長嘅蜘蛛俠卒之都喺預告片出現咗… 一秒咁大把,要等到4月尾套戲先上呀,可能阿沖哥都嬲豬啦,佢一啖就咬咗落個蜘蛛頭度,仲有o趙添呀…!仲話感覺ok喎… 嗚呀阿沖哥 #你真識食

Khao San Market

地址:161, 163 Khaosan Rd, Talat Yot, Phra Nakhon, Bangkok 10200 (顯示地圖)
電話:沒有提供
營業時間:19:00~00:00 (週一休息)
網址:沒有提供
前往方法:搭BTS到Saphan Taksin站3號出口到中央碼頭,再搭船去13號碼頭 Phra Arthit Pier。

04. 130蚊霸氣海南雞飯

泰國嘅海南雞飯好味就出晒名㗎啦,無骨啖啖真係肉爽呀!最好食係邊間呢?阿沖哥都話人人口味唔同答你唔到呀,至於最霸氣係邊間?肯肯定係呢間喇啩?

嘩呢碟單手不能掌握嘅海南雞飯,用咗2000克嘅米同埋全隻雞整嘅,每碟大概130港紙,6, 7個人share都夠飽啦!

咁都唔止呀,如果一個人可以一個鐘内食晒成碟可以免費之餘,老闆仲會送埋隻碟俾你,幫你影張威水相放喺舗頭入面做生招牌添!嘩贏咗第日帶啲friend子返嚟睇返自己張相都咪話唔型棍呀!

ศรีเหลืองโภชนา สะพานควาย (ซอยโรงหนังพหลโยธินรามา)

地址:1511/71-74 ซอยโรงหนังพหลโยธิน ถนนพหลโยธิน แขวงสามเสนใน เขตพญาไท, Bangkok 10400 (顯示地圖)
電話:+66 86 326 8586
營業時間:08:00-16:00