呢個世界有好多美食係我哋唔識㗎,Do姐同農夫嘅全新節目《Do姐有問題》裡面就安排咗問題特派員去到世界各地搜尋特別嘅飲食文化同美食俾大家睇,東京篇就搵嚟有日文嘞嘞聲嘅「問題暖男」周奕瑋呀 #hehe,佢會帶大家喺東京食奇怪部位内臟,去無廚師但係可以食到全球美食嘅酒吧一探究竟,試食最霸氣天婦羅,去嚇到個心離一離嘅主題餐廳,再拜訪神乎奇技嘅日本神雕手。

撰文:尼克。泰國。流浪看 

推介01| 定律嚟㗎嘛!即食豬乳房(第3集)

東京龜戶區雖然唔係遊客區,但係鐘意食内臟嘅日本人都會特登嚟呢度食㗎,有乜咁特別?

估唔到一出場,老闆就交個心俾周奕瑋喇 #hehe!牛心刺身加蒜加蔥加豉油就食得,瑋瑋仲話食落似海鮮,但係0答真啲竟然有牛奶味㗎喎!

之後老闆仲攞咗個内臟明星薈(ホルモンAllStars)出嚟,裡面有牛胃、牛胰臟、豬腸等等12款内臟俾你慢慢燒,瑋瑋話豬喉嚨軟骨食落似出面包咗層豬肉嘅雞軟骨喎!又牛又豬又雞,媽好亂呀!

最後出場嘅係豬乳房,中間凸起嗰度就係豬乳頭喇,燒完係帶子裙邊口感,豬頸肉味喎,老闆仲話係男人都鐘意食㗎,梗係啦,有奶便是娘定律嚟㗎嘛!

ホルモン専科ちゃん

地址:東京都江東区亀戸6-61-2 (顯示地圖)
電話:+81 3-5628-5886
營業時間:14:00-22:00
費用:牛心刺身 – 660円;内臟拼盤 – 1540円;豬乳房 – 500円

網址:http://www.kameido-chan.com/
前往方法:JR総武本線(東京-銚子)亀戸駅東口 徒歩1分

 

推介02| 東京酒吧食勻環球美食,但係無廚師?(第4集)

東京嘅白領上班族放工時間去到神田區想飲吓嘢到底會去咩特別地方呢?

飲酒梗係要有嘢食送酒啦,呢間酒吧竟然日式玉子燒、西式漢堡扒,甚至中式麻婆豆腐等等環球美食都有!但係呢度竟然係無廚師㗎!

原來呢間酒吧所有嘅食物都係罐頭嚟㗎,仲有超過200款選擇添!一次過食勻全球「家的風味」!

連蝗蟲罐頭都有,好出奇呀?蝗蟲嘅嘢香港大把啦(好似係)

Mr. Kanso

地址:〒101-0048 東京都千代田区神田司町2-15-16 サトウビル1F (エリア: 神田 (顯示地圖)
電話:+81 3-3259-7701
營業時間:17:00-01:00
費用:蠔罐頭 – 750円;玉子燒/漢堡扒/麻婆豆腐罐頭 – 各550円;蝗蟲罐頭 – 420円
網址:http://www.cleanbrothers.net/kanso.html

前往方法:都営新宿線小川町(東京都)駅A6口 徒歩1分

推介03 | 元祖級名物,霸氣企硬炸蝦天婦羅飯(第6集)

東京呢間有45年歷史嘅餐廳最出名就係食蕎麥麵同天婦羅,睇落就同普通嘅平民食堂無分別,但係就隱藏咗一款特別嘅美食

佢就係連碗帶蝦成碗高32厘米嘅炸蝦天婦羅飯,超過1呎長㗎,淨係蝦身都22厘米長

呢間平民食堂40年嚟炸蝦飯都係打平上嘅,而呢區本來都死氣沉沉生意唔多好,但係自從晴空塔(Sky Tree)起好之後,帶旺晒成區,老闆為咗向晴空塔致敬所以就將製作咗打直上嘅企硬炸蝦飯喇。

瑋瑋試完就覺得好脆口又鬆化,熱辣辣超好味喎,連老闆都話 #你真識食!

Soba Kamimura そば処 かみむら

地址:東京墨田區業平1-18-13 (顯示地圖)
電話:+81 3-36251205
營業時間:11:00-20:00;週日- 11:00-15:00
費用:每碗1800円
網址:沒有提供

前往方法:地下鐵業平橋站步行約1分鐘。

推介04 | 醫院主題餐廳,幫小莉開腦(第9集)

日本嘅主題餐廳同酒吧今時今日已經梗有一間喺左緊嘅地步喇,究竟點先可以吸引到人幫趁又呃到like呢?飲杯嘢都要搞場大龍鳳是常識吧?

呢間醫院主題餐廳就有款cocktail「血液檢查」,係杯黃色液體(菠蘿西柚汁)跟一枝A型血(糖漿)一齊上,跟住瑋瑋咁身條脷仔出嚟jit啲糖漿落去,再啜啖菠蘿西柚汁就係日本最人氣嘅飲用方法喎!

而呢款cocktail就更加要用針筒將公仔頭上面嘅酒抽出嚟,好似抽腦漿咁飲,真係嚇到個心都離一離呀!瑋瑋話隻酒味幾濃添㗎!Btw,個公仔… 是咪小莉嚟㗎?

而呢度嘅啤酒仲用尿壺裝添呀… 好妙呀… 又黃又有泡咁樣樣,如果係熱啤的話咪仲… 嗚呀

ALCATRAZ.ER渋谷道玄坂 刑務所病院レストラン アルカトラズE.R.

地址:〒150-0043 東京都渋谷区道玄坂2-13-5 ハーベストビルディング2F ALCATRAZ.ER Japan Tokyo Shibuya Dogennzaka2-13-5Harvest2F (顯示地圖)

電話:+81 3-3770-7100
營業時間:週日至四 – 17:00-23:00;週五六- 17:00-03:30
費用:「血液檢查」- 590円;「腦内Party」 – 890円;尿壺啤酒 – 1700円
網址:http://alcatraz-er.net/
前往方法:JR山手線,至渋谷站,徒歩7分鐘。

推介05 | 神雕手.雕隻狗,江滬時代神乎奇技(第10集)

東京有一位好厲害嘅神雕手,細細個就好鍾意雕嘢㗎喇,雕出嚟嘅作品唔止好精緻,而且仲食得添!

呢種雕刻糖果手藝,由江滬時代流傳落嚟嘅,柴犬糖(2480円)就係呢位師傅嘅得意作品之一

瑋瑋又忍唔住要奶一啖試吓味喇 #hehe 佢話係硬糖嚟嘅,味道都唔會話好甜

師傅話咁都未算,呢款金魚糖(3480円)先係神雕手嘅至高境界呀,因爲整金魚糖最緊要快,喺啲糖仲熱未硬嘅時候就要摙好個型,喺江滬時代已經係高檔貨嚟㗎喇,難怪賣成差唔多250蚊港紙一粒啦,點捨得食呀?

飴細工アメシンは

地址:東京都墨田區押上一丁目一番二號四樓 (東京スカイツリータウン・ソラマチ4階 イーストヤード11番地) (顯示地圖)
電話:+81 90-4457-2082
營業時間:10:00-21:00
網址:http://www.ame-shin.com/shop/soramachi/