【大浪西灣行山路線】
難度：★☆☆☆☆
長度：★★★★☆（約12公里）
時間：約五小時
起點：西貢碼頭＞巴士94／96R＞北潭凹
終點：西灣＞快船＞西貢碼頭 或 西灣亭＞村巴29R＞西貢碼頭
路線特色：
陽光沙灘與行山，平坦易行，多茶座又多廁所，CP值奇高！
牛屎出沒注意，同時留意番尾班村巴時間（http://www.i-busnet.com/busroute/resi…）
宜：情侶、一家大細、行山初哥、想影靚相的你、一班麻甩佬（沙灘 你懂的）
忌：追求山景或開揚景色之人、雨季（小心山泥傾瀉）
沿途景點
01 ｜ 赤徑
首先會到達第一個景點－赤徑，可以瘋狂影相嘅地方！
02 | 鹹田灣
經過茶座到達鹹田灣，景觀一流嘅沙灘，行番上去可以睇到鹹田灣全景！
03 ｜西灣小溪
繼續向前行，會經過西灣小溪，可以同溪水玩遊戲。
04 ｜ 大浪西灣
終於到達終點大浪西灣喇！見到個景咁靚，行咁耐都抵啦！
大浪西灣 純文字攻略：
- 大家可以先喺西貢碼頭集合，再轉搭94／96R到北潭凹落車，入口就會喺你對面喇！
- 約5分鐘：你就會見到一條冇路牌嘅分岔路，右邊係一個上梯級路段，請直行。
- 約20分鐘：有路牌，左邊往黃石碼碩，右邊往鹹田，請轉右。
- 約35分鐘：右邊係小路，直走係麥理浩徑方向，請直走。
- 約40分鐘：左轉就係第一個景點－赤徑，直走繼續行程。
- 約55分鐘：第一個洗手間。
- 約1小時5分鐘：有路牌，左轉（不明），直走往鹹田，請直走。
- 約1小時10分鐘：左轉（不明），直走係麥理浩徑方向，請直走。
- 約1小時40分鐘：左轉上蚺蛇尖，直走往鹹田（開始落山路段），請直走。
- 約2小時：第一間茶座。
- 約2小時25分鐘：有路牌，右轉往西灣，左轉往鹹田灣，請左轉（雖然右轉先係正式路段，但難行同長好多，所以極力推介左轉，我行過所以我知道）。
- 約2小時40分鐘：茶座三號，海風士多，嘢食較多選擇。
- 約3小時10分鐘：離開海風士多，過咗獨木橋後，右轉沿住沙灘行，行十分鐘左右就會見到有梯級上山。
- 約3小時55分鐘：落山後見到小溪，踏住碎石過小溪後往左行，沿沙灘行約10分鐘，右手邊會有梯級接上石屎路。
- 約4小時10分鐘：到大浪西灣（搭船返西貢碼頭）。
- 到達大浪西灣可以搭船返西貢碼頭，亦可以選擇行多一段去西灣亭搭村巴29R返西貢。不過，由於今年2016年5月尾發生過一次嚴重嘅山泥傾瀉令村巴停駛，所以要再行多一個小時出北潭涌先有巴士搭。