好啦!來到今日,大家都知道好多網站為咗得到你click入去閱讀,基本上譁眾取寵無所不用其極,當中撰寫「冧把降文章」(即係數「9大乜乜乜」、「10個你不可不知道的乜乜」格式的點列文章Listicles)尤其多中伏位,阿珍有時自己都會唔覺意撳咗嚟睇,編輯約稿都會叫阿珍用呢啲做標題,但係為咗唔變成「廢文」,喺可能情況下,都真係會做番足夠查證工夫,費事被人笑。

旅遊網出文 傳媒追住報

最新近一個case,就係 7 月 19日 Skyscanner台灣分站嘅文章,作者叫做Cynthia Chang,(有冇人識佢呀?)標題叫做「10大危險旅遊國家」,雖然已經戴晒頭盔地作出溫馨提示,表示文章係純粹資料整理「……讓你可以提早防患未然」,但仍然難掩以偏蓋全,結果咪出事囉!

10 大旅遊危險國家,今次邊個入圍?

先看看作者 「Cynthia Chang」 評選邊幾個旅遊危險國家先:

  1. 比利時(恐怖襲擊)|由於邊境管制寛鬆,儼然已成恐怖分子藏匿的大本營,今年就發生機場及地鐵遭連環爆炸的襲擊。
  2. 印度(暴力性侵)|印度男性經常在街上非禮女性,近年亦不時發生駭人的暴力輪姦案。
  3. 土耳其(恐怖襲擊、詐騙)|政變後局勢未明,加上伊斯坦堡成為恐怖分子襲擊目標,今年就發生五宗炸彈襲擊,令旅客卻步。
  4. 巴西(搶劫)巴西一向治安奇差,里約熱內盧和聖保羅等大城市的街頭暴力十分嚴重,女性若在街上見到三五成群的年輕男性最好迴避。
  5. 泰國(詐騙、暴力性侵)泰國消費便宜,美食眾多,一向受國際旅客歡迎。不過近年泰國的詐騙案不斷增加,被騙到黑店消費、在酒吧遭下迷藥後洗劫的案件屢傳。
  6. 墨西哥(毒品、治安)墨西哥長久以來受毒品及幫派衝突問題困擾,治安不靖,美國遊客在此地遭遇槍擊、綁架、劫車和攔路搶劫,去年曾向墨西哥發出旅遊警告。
  7. 南非(暴力抗爭、治安)南非政局長期不穩,各大城市持續發生大規模暴力抗爭,加上8月將舉行地方選舉,預料危險程度更令人憂慮。
  8. 蒙古(偷竊、暴力性侵)蒙古是新興旅遊熱點,但有歹徒針對遊客下手竊取財物,尤其在首都烏蘭巴托常有扒手趁人多偷走銀包手機等。也有不少醉漢晚上會騷擾女性。
  9. 意大利(扒手、偷竊)多個主要城市都有扒手猖獗的問題,一不留神就有可能成為受害人。
  10. 菲律賓(疾病傳染、天災)不時發生外國人被綁架、登革熱傳染病流行等問題,除了長灘島依舊擁有高人氣外,馬尼拉等地的遊客人數持續減少。

    ##embed-label-0##

阿珍點評:點解冇中國?

基本上你唔會睇到好確實嘅數據,甚至冇引用官方機構嘅旅遊警報(最近德國恐襲又唔見佢講),都係憑印象去講嘅「危險」,道聽塗說,你厚面皮少少都可以寫得到!雖然有個別入選地點阿珍都覺得係危險唔應該去,但如果要計起上嚟,阿珍想問點解中國冇入圍?排洪唔通報、跨境擄書商、黑心食品、高鐵追撞……其實都好危險吖!

其實今時今日讀者都應該有番咁上下分析力,對呢類「10大乜乜」文章,都應該清醒少少唔好立亂信晒,尤其係作者身分不明,就唔係太認真;至於作者方面,唔係唔畀你寫吹水文,不過都要符合少少事實、分享多少少個人心得,尤其是列出「危險國度」呢啲影響人哋生計嘅文章,就最好有多少少事實去支持論述啦!

無端端被針對  冲哥感不忿

對於文章選取泰國作為「危險國家」之一,泰國通胡慧冲就感到極之不公平。長年旅居當地,佢認為要數「危險國家」輪都未輪到泰國,就算最近爆出篤篤車劫案,但在Roger跟進之下,都見到泰國警方高度關注而且有效率追捕匪徒。雖然文章有引述英國《Daily Mail》將泰國列入  // 針對女性遊客所評選出「10大危險旅遊國家」中的第4名// ,但其實已經係2014年嘅數據同報道囉!

其實阿珍同冲哥一樣,都好想知「Cynthia Chang」去過幾多次泰國,又或者做咗幾多research工夫去將泰國列入危險旅遊國家。