早前去西班牙穿州過省,為了慳番時間金錢,於是決定大膽 自駕 遊。雖然試過多次在外地揸車,但揸左軚車都是我第一次喔,仲要係歐洲車,本身揸開日本車的我表示唔多慣。每次打燈都要睇真啲諗清楚,用錯水撥更是由頭到尾都會犯的錯…… 自駕 了一星期,冇穿冇爛,係食咗人生第一張西班牙牛肉乾。以下 自駕 心得可以開心些呀,做個精明駕駛者。

咪錶你真狡猾,老是唔出現

街位真心平,1歐可以泊成日,而且部分時間更是免費任泊。車位為藍色框框內,咪錶未必在車位附近,分分鐘在街頭巷尾,真係要搵清楚!入錢後,將單據放在車頭左邊,否則就會被抄牌。好似我見唔到咪錶,變違例泊車慘食牛肉乾!二十天內要在地區警署付費,每次30歐元,過期則貴一倍,要乖乖交罰款。

還可以纏繞你120km/h

高速公路車速限制為時速120公里,左邊為快線,扒完頭要轉番線咪做快線L!不過當地人當然唔會奉公守法,飆車飆到拓海咁,以為自己玩緊GTA!我們用的GPS有相機提示,幾時收油你識做啦。高速公路不時會有警車設置路障,超速駕駛醒定啲。我重申,我冇暗示任何嘢。

油站午休中,明天請早

對,鄉村的油站有午睡時間,去到唔會有人理你,建議在公路旁較大的油站入油,不過大部分都要自己郁手。入油後記住泊位號數,走入便利店付款就得。最常見的油站為Repsol,不過其實間間價錢分別不大,五月時油費大約每公升€1.2/$10,算幾抵!

GPS靠得住,黑毛豬都上樹

我們的GPS較舊,一般公路及高速都尚算準確,但亦有時會神神哋,駛進入一個不毛之地,應該是仍未update新版本有關。一入到小城鎮情況更可怕,就有機會亂指一通,最鍾意指你行窄到人都未必過到的小巷,好恐怖!所以一定一定要開埋Google Maps,雙管齊下最穩陣。