杜遊珍最近在 fb 見到一位姊妹出動 10 個感歎號,大鬧剛剛在飛機上遇到的不快,回應超熱烈!唔少朋友都一齊數受過航空公司嘅冤屈氣。有見及此,我杜遊珍決定借傳媒力量,塞錢畀航空業,舉行「第一屆 航空服務 業申訴大會」,幫姊妹發泄之餘,亦希望業內人士可以檢討同反省!

01) 機艙遇小強 空少掂行掂過?!


姊妹 R 搭「XX」airline 由台北回港,因為機內走道擠塞,等咗好耐先排到隊入座,點知呢個時候發現頭頂行李櫃底有隻小強「倒掛金鈎」,活潑生猛,唔計觸鬚足足有兩截手指尾長!仲向 R 步步進逼,R 與友人一邊縮低一邊叫喊,但由於飛機剛開始起飛無人可以求救,好彩捱到安全帶燈號熄滅小強仍然健在,R 立即按燈叫空服員處理,點知第一名空少不聞不問關掉服務燈就走咗去!R 只好再按燈,到另一空姐知悉後,粒聲唔出拿紙巾一手擒拿小強就俏俏離去。完全沒有驚動其他乘客,其訓練有素的程度,令 R 不禁懷疑小強是否飛行常客!!

02) 閱讀燈甩掣 燈泡辣手

姊妹 B 貪平搭「咖喱」航空去大阪,坐低時頭頂閱讀燈已經亮著,但頭頂愈照愈熱,打算熄燈時粒掣竟甩埋!求助空姐時只獲得:「自己搞掂佢」的款待,叫 B 自行擰轉燈罩關燈。點知就畀燈罩辣親,勁嬲!

03) 爛櫈中空像屎塔 嘈足全程

幾年前姊妹 F 去睇洋葱頭教堂,搭國營的「L伐」舊機出發,一坐落個位度就覺唔對路,椅子中間凹陷,F 形容似「坐屎塔」,要求換位。但因航班太 Full 無得換,惟有局坐 9 小時啦!點知同機的「洋葱頭」女乘客們勁嘈,向空姐投訴都勸喻不果,結果F 黑面坐足全程!