港女去旅行,搵小動物自拍影相呃like是常識吧!不過,奈良鹿咁「崇洋」,見到亞洲人就眼超超,好唔合作囉!想影靚相,其實去澳洲搵 短尾矮袋鼠自拍 仲好啦!表情多多又識搶鏡,唔怕人黐住合照自拍都得。加上天生嘴角上揚,望落笑咪咪超級得意,瞬間成為繼樹熊、袋鼠之後,遊客至like的澳洲小動物!

爭住合照!#QuokkaSelfie熱爆網

講起澳洲,人人都會想起袋鼠、樹熊。不過今期動物界最紅的,並不是牠們!而是被稱為「世界最快樂的動物」的短尾矮袋鼠(Quokka),因為牠們嘴角天生上揚,左望右望都笑咪咪,感覺超級可愛。長期keep住個笑樣,永冇嬲豬,而且不怕生暴,不會攻擊人,近距離影相都冇問題。因此迅速成為網絡紅星,個個爭住飛起澳洲跟牠們合照,更有專用hashtag(#QuokkaSelfie),粉絲一按即可以搜察到大量萌爆的可愛動物照。

抵你紅!推獨家自拍寫真集

相比起最經典的澳洲嘜頭大袋鼠,短尾矮袋鼠體形較小,但肚子上一樣有著袋鼠的正字標記「育嬰袋」,只是體形相當小巧可愛,手短腳短尾巴短,圓碌碌的身材,配上拍得住倉鼠脹股股的雙頰,感覺實在太治癒了!除了吸引遊客專程到西澳朝聖,待遇更加拍得住大明星,有專人為牠們推出寫真《Quokka #クオッカ 世界が撮った小さなともだち》,在Amazon都有得賣!(連結)唔係水著靚女出寫真先有人捧場,Q爆的短尾矮袋鼠超搶手,銷量一定勁過C煙。

買少見少!遇瀕臨絕種危機

短尾矮袋鼠其實是澳洲西南部特有的草食性動物,主要食葉子、種子,以及植物根。隨地執起葉子,都可以引到牠們靠近。性格溫馴,加上充滿好奇心,見到相機鏡頭就會很好奇,想跟牠們自拍影profile picture,絕對不會失望。可惜這隻可愛的動物數量愈來愈少,因為受到外來種生物的競爭與威脅,以及繁殖力不高的關係,被世界自然保護聯盟列為「中度瀕危物種」。所以想跟牠們合照,就要快快出發澳洲喇!