最佳旅友：陸永C君 type
先不討論同伴侶去旅行幾sweet幾開心（唔知點解經常會旅行時鬧交），而係同某幾個朋友去旅行，就算個旅程其實好悶，個景點分明呃錢，有佢哋喺度，都一定會好開心。要貼切地形容，呢幾個朋友，就好似《Do姐再Shopping》入面嘅陸永同C君一樣，令成個旅行都咁歡樂。
男人老狗攞勁大個行李箱，原來入面有……
有一次，我同一班男性朋友去泰國，諗住難得周圍食下嘢，去游水做按摩hea玩，所以幾乎冇plan過行程。其中一個朋友叫阿Son，由中學識佢十幾年，最鍾意成日搞爛gags，但一班人有佢喺度又會好開心，笑下輕鬆下咁又一日。去旅行都係為咗開心啫～
出發當日，一去到機場見佢攞住鬼死咁大個行李箱，我哋全部男人都一個背囊就搞掂，就笑佢成個女人咁姿整。
點知一去到酒店，阿Son大嗌一聲「登登登櫈」打開個行李箱，原來佢帶咗部PS4同埋Switch過嚟，想同我哋一齊玩。「嗱嗱！頭先兩樣唔係重點，大家睇下呢個係乜？！」阿Son攞咗個最近好流行嘅「獨角獸水泡」出嚟……
「你唔係要我哋騎住呢嚿嘢嘛？」
「攞到嚟唔係唔用嘛？我特登淘寶買㗎！」
表面就話佢傻，實際上感謝有阿Son
本來我哋成班friends都話佢黐線，於是阿Son當晚已經冇再提過隻獨角獸。點知，就喺第二朝我聽到酒店個廳不斷有怪聲傳出嚟，我就行出去望下……原來，阿Son一早起身幫隻獨角獸泵氣！ 「阿Son你喺度做乜？」
「我見你哋冇興趣，我諗住自己一個去沙灘……」阿Son眼泛淚光。
於是我哋成班大男人，食完早餐就去咗酒店個私人沙灘，一齊玩隻獨角獸！老實講，雖然全程都飽受其他人嘅奇異眼光，但真係玩得好開心。第二日，阿Son經過泰國一間髮型屋突然講：
「不如搓包剪揼輸咗入去剪髮！」
結果，阿Son輸咗！佢剪咗個九一分界嘅剷青頭出嚟！
我好慶幸有呢種朋友，就算唔係去旅行，得閒搞下爛gags，又做特別多白癡嘢，就算點都唔會悶。我知道其他人都係咁諗，所以我成日都諗…… 如果冇咗阿Son，我哋成班朋友，仲會唔會成日約到出嚟呢？