女生必著：粉紅色和服
去得京都呢種千年古都點都應該著下和服影相，而且聽夏蕙BB講，一定要著粉紅色。理由？唔駛，去到京都衹園或寺院，見到個個就算係日本人(京都係日本人的熱門旅遊目的地)都係著和服影相，就知自己仲着住件Zara大褸，Forever 21短裙係幾咁騎呢。不過你後知後覺就為時已晚，因為香港人最喜愛嘅粉紅色系晨早就被人搶晒。
唔係求其笠件粉紅色古裝就算係粉紅色和服，識著一定係
1.粉紅色(ピンク，即Pink)
2.振袖 (振袖)
3.和服 (着物)
先至能夠將你潛在嘅女子力完美地散發出嚟。
唔好著錯！和服分類要知道
再講究就要睇埋質地係唔係100％絲綢(正絹)、製造者(職人)，不過如果要求埋呢D通常租一日連化粧攝影都起碼過萬，日本人都係有錢人家的成人式先至會捨得租。如果要買則更誇張，一百幾十萬到一千幾百萬不等，但你到時會唔知應該點同銀行解釋要按揭套和服，然後佢仲要sell埋你買家居保，火險同保險箱。
講返正題，和服分好多種，而當中「振袖」先係小女子應該着嘅款式，特點係花色鮮艷，袖口有個好似魚鰭咁嘅裝飾，成排益力多塞入去應該都仲有位，好似上圖AKB48個横山由依咁，亦有長到可以塞得落成棵桔嘅大振袖。如果你見到件和服袖口冇咁長，呢件應該就唔係「振袖」而係「留袖」，而「留袖」則是媽媽輩為咗顯示自己係會家務而唔係淨係睇電視劇嘅，好似下面呢張圖咁。
Photo: 晴れ着の丸昌
想着粉紅色和服？記得上網提前預約！
雖然京都有好多間和服出租店，集中喺清水寺和祇園附近，但係質數參差，有D着上身會似帆布袋，有D平價Plan甚至唔可以畀你揀自己鍾意嘅款式。就算你搵到一間好嘅，去到嘅時候有機會會遇到約滿的情況（幫人客穿着和服需時半個鐘以上），輪到你時可能已經到下午2、3點冇乜款揀，而和服髮型通常係必須預約，所以一定要上網提前預約，一定要上網提前預約，一定要上網提前預約。（因為很重要所以説三遍）
喺Klook個網頁度預約，可以選最早嘅時間10點，其實只要係早上時間都應該冇問題，唔駛好似藍橘子大年初一去黃大仙搶頭注香咁樣（媽我好亂呀~！）。
揀好款，變身和服少女！
抵達後同工作人員講係 Klook 租借和服Plan(或和服+日式靚靚髮型Plan)的，工作人員會帶你去揀款。揀好就可以襯埋腰帶(おび/帯)，同埋內搭衣領(はんえり/半襟，如要特別花色要加錢)，如果唔識自己配搭，可以同工作人員講「餓-su-su-咩」(おすすめ)佢會幫你揀，跟住就會有換衫阿姨就會幫你去變身啦~！
如果預約咗日式靚靚髮型，主要係分為比較整齊嘅日本傳統式，或者似日本雜誌嘅流行款自己選擇，店家會有定番髮型可以選擇，亦可以有特別要求。
着埋附送嘅全新長襦襪(足袋，著完可帶走)，草鞋，和服專用袋，寄放好行李，就可以出發去京都一日遊lu~
