同女友旅行最緊要食得開懷，頂多返黎一齊減肥

「乜你又去旅行啊？真係有錢…」每次我請假，同事都一定講呢句。

「我都係死慳死抵儲返黎咋。」
「又同女朋友去？」
「唔通同你阿媽去咩！」

由於唔想繼續討論，我就直接斬斷呢個話題。我知道跟住落黎，同事一定會講「點解唔儲錢黎買樓？」「其實香港乜都有得食，慳返機票錢…」。

我同女朋友約定過，一年點都會去一次旅行，就算係近近哋去轉台北都好。雖然我唔係嗰度窮遊深度探討文化，或者揹住個背包環島嘅人。每次去旅行，其實只係食、玩、買…咁我開心嘛，你理得我啫。

唔知點解，去旅行用錢係會闊綽啲，尤其身邊有女朋友呢隻魔鬼，我一拎起件衫，佢說會話「買啦～買啦～香港無啊～Made in Japan唔算太貴啫。」

佢目的係想我萌生起購物嘅罪疚感，當佢自己有嘢想買時，「阻力」就會相對少好多。無錯，每次去旅行，我哋都扮演對方嘅魔鬼，除咗瘋狂購物，仲有瘋狂咁食食食！

雖然好多嘢香港都有得食，但一來隔離飯香，二來硬係想試吓原產味道係有咩分別。

「又唔係成日食，唔緊要啦～」
「香港咁貴，日本吞拿魚又新鮮，梗係食返夠本啦！」所以每次旅行完，除咗行李重咗好多，我同女朋友都會肥幾磅。

人類總要犯同樣的錯誤，去到旅程最後一日執行李就會開始後悔。

「一日五餐，咁食落去唔係辦法，妳睇吓妳個肚腩突晒出嚟…」我拍一拍女朋個肚。
「唔緊要啦，返香港一齊減肥囉。」

「仲要慳錢啊，咁買法，行李都唔知會唔會過磅…」

去到機場，就算幾熱都著幾件褸，將最重嘅衫同著晒上身減輕行李磅數是常識吧。最後見到啱啱好無超重，嗰種喜悅感，就好似考試無溫過書，但竟然會合格一樣！