台中清泉崗機場(RMQ)位於台中沙鹿區,係台灣中部唯一的聯外機場,近年因為HK Express開設香港來往台中的航線,令到台中機場成為香港人去台灣會飛往嘅機場之一,經呢個機場除了去台中外,仲可以去到唔少位於台灣中南部的景點,例如南投清境、合歡山、日月潭、集集、阿里山等。各位網友應該唔會未飛過去呢個機場吧,但小編相信各位網友都會覺得呢個機場嘅對外交通真係好唔方便,有啲網友甚至問過小編:可唔可以出返台中火車站/台中高鐵站唔坐的士?因此小編匯集從台中機場前往大家主要會去嘅地方嘅搭車方法,讓你沒有難度的去發掘台灣中南部的自然美麗!

(1) 台中機場乘車位置

台中機場搭車其實唔太難,當你拎晒行李、喺台灣銀行撳晒錢/唱晒錢(你可能喺禁區部ATM撳左都唔定LOL),同埋喺中華電信Counter申請埋電話卡後,如果你要搭公車或者的士,就喺中華電信斜對面嘅扶手電梯落一層去B1/F,你會先看到的士站,再行前少少就有一個候車室,候車室前面就係公車站了,大家自己睇返各候車月台嘅路線表,揀返啱路線上車就可以了(提多句,台中搭公車用悠遊卡都無問題了)。但如果你係訂左包車或者共乘車上清境,通常司機會喺中華電信出面個上落客區等大家。

(2) 你要去哪裡?

(A) 台中火車站/臺鐵台中站

Method 1:坐中台灣客運公車302路(台中航空站<->台中公園),可以唔駛轉車直達台中火車站,班次唔算密但旨在方便到台中火車站,全程約需60-65分鐘,至少公車會平過搭的士出市區先(刷悠遊卡NT$30);但千祈唔好上同樣去到台中火車站的公車9路,要坐好耐的。

Method 2:亦可以先搭的士到臺鐵清水或者沙鹿站,然後搭臺鐵到臺中火車站,但清水/沙鹿往台中的臺鐵不但係站站停的區間車,而且班次唔係多,時間同搭302路公車差唔多,所以大家可以衡量一下。價錢方面大概是NT$200-220。

Method 3:如果搭的士去台中火車站的話,最快係行中清路、五權路同台灣大道一段前往,價錢Around NT$450-500。

(B) 高鐵台中站

Method 1:坐台中客運高鐵快捷公車156路可以直達高鐵台中站/臺鐵新烏日站,但班次比起去台中火車站的302路為疏,走左一班車可能要等個幾兩個鐘先有下班車,但勝在係往來高鐵站最平的方法(刷悠遊卡NT$29),所以大家可以諗諗。

Method 2:亦可以考慮搭台灣好行日月潭線前往高鐵台中站,但每日只有15:20一班車,票價NT$50。

Method 3:你都可以先搭的士到臺鐵清水或者沙鹿站,然後搭臺鐵到新烏日站轉高鐵,但都係嗰個問題:區間車行走+班次唔多。

Method 4:如果搭的士去高鐵台中站的話,最快係行國道3號去,價錢大約NT$750-800。

(C) 日月潭/清境/埔里


上日月潭的話,台灣好行日月潭線每日15:20有一班車從台中機場開往日月潭(水社),而其餘時間要坐巴士到日月潭,就要先坐去台中高鐵站再搭車(台灣好行/南投客運)上。價錢方面,台中機場單程往日月潭為NT$240,台中火車站/台中高鐵站單程往日月潭要NT$190。

去埔里的話,都係要先搭去台中火車站/台中高鐵站再轉台灣好行/南投客運埔里、日月潭線上;
而去清境更加要喺埔里轉多程車上,而且埔里往來清境的班次本身唔算多。

因此各位網友可以考慮一下包車或者搭共乘車去南投嘅主要景點(特別如果你要上清境,係最好包車/共乘車上),價錢由NT$500-2500不等,小編會喺下面Useful Link一欄提供少少連結大家參考一下。

(D) 一中/逢甲/高美濕地

一中街直接去的話只有繞路的公車9路可以去到,或者搭公車302路到台中公園落車行過去,所以小編會建議大家坐的士去(Around NT$400-450)。

至於逢甲嚟講,小編都係建議大家最好搭的士去,因為公車都要喺秋紅谷/朝馬轉運站轉一次車先會去到逢甲路一帶。

而去高美濕地的話,一係你先搭的士到清水火車站,然後轉公車178路同179路去,但要留意返班次;一係就直接從機場搭的士去。但無論你揀咩方法,請最好搵個地方安置你啲行李先(台中機場有Locker放到行李的)。

(E) 阿里山

(此圖來源:阿里山森林遊樂區粉絲專頁)

Method 1:你可以先搭公車302路/的士到台中火車站轉台鐵到嘉義,然後喺嘉義火車站前站轉台灣好行阿里山線B線上阿里山,全程大概需要4小時15分鐘左右

Method 2:你亦可以先搭的士到臺鐵清水或者沙鹿站轉台鐵到嘉義,然後喺嘉義火車站前站轉台灣好行阿里山線B線上阿里山,全程大概需要3小時30分鐘左右,比方法一略快,但去到嘉義嘅班次其實唔多,所以大家要衡量一下。

Method 3:你又可以搭公車302路/69路到秋紅谷落車,然後行去朝馬轉運站轉國光客運或者和欣客運台中至嘉義線,喺嘉義轉運站落車去返嘉義火車站前站轉阿里山線B線上山,全程約4小時。

有兩樣嘢想提一提:

  1. 搭高鐵到嘉義站轉台灣好行阿里山線A線呢個方法,由於A線一日從高鐵嘉義站只開三班10:10、11:40及13:10上,除非你會喺台中留一晚後第二日上阿里山,否則呢個方法大家從台中機場出發應該用唔著,但小編喺Useful Link都會比埋阿里山線A線資料大家睇。
  2. 如果你想坐阿里山森林鐵路上阿里山,請記得阿里山森鐵全線還未有復駛,本線而家最多到奮起湖,如果你想坐小火車到阿里山,到奮起湖後要轉巴士上阿里山的。相關班次小編會於Useful Link比返。

至於有網友會問好唔好包車上阿里山,其實係有包車上阿里山的,但價格大概係NT$5500;
如果你多人同行的話係可以考慮,但如果你得幾個人同行,從台中/台中機場出發圍起上嚟會好貴。
因此,如果你要包車上阿里山,其實最好到高鐵嘉義站/嘉義火車站先包車上,At Least會平左一截先。

關於阿里山包車方面,大家可以參考一下呢個網站:http://www.gogo-alishan.com.tw/alishan-taxi.htm

(3) 小結

始終小編唔能夠陳列從機場去所有景點的方法,因此如果各位網友有啲地方唔知點去,可以Inbox我地 台灣.日和​,希望呢篇可以幫到大家玩盡台灣中南部!

另外提一提,台中市公車如果用悠遊卡搭,10公里內的路程都是免費的。一來去台中請記得帶悠遊卡之餘,如果你唔多行李的話,你可以考慮一下到10公里時轉一轉車慳錢。同埋去台中搭公車,記得先去Apple Store/Google Play先下載「iTravel_台中」Apps,搭公車方便好多喔!

台灣.日和:https://www.facebook.com/taiwan.sunlight/

Useful Link:

台中市政府交通局-線上查詢:http://www.traffic.taichung.gov.tw/form/index.asp?Parser=3,7,161,52

台中市公車302路:http://www.traffic.taichung.gov.tw/form/index-1.asp?Parser=3,7,161,52,,,1818,212

台中市公車156路:http://www.tcbus.com.tw/image/lineimage.php?imagetest=156

台中市公車178路:http://www.traffic.taichung.gov.tw/form/index-1.asp?Parser=3,7,161,52,,,2052,19,,,,,178

台中市公車179路:http://www.traffic.taichung.gov.tw/form/index-1.asp?Parser=3,7,161,52,,,897,19,,,,,179

臺鐵時刻查詢:http://twtraffic.tra.gov.tw/twrail/

阿里山森林鐵路:http://www.railway.gov.tw/tw/Alishan/page4.html

國光客運1870路(台中<->嘉義):http://www.kingbus.com.tw/ticketPriceResult.php?sid=179

和欣客運台中朝馬至嘉義線:http://www.ebus.com.tw/ebus/images/timline/new/%E5%8F%B0%E4%B8%AD-%E5%98%89%E7%BE%A9.jpg

台灣好行日月潭線:http://www.ntbus.com.tw/tour-sml.html

台灣好行阿里山線A線(高鐵嘉義站往阿里山):http://www.taiwantrip.com.tw/Besttour/Info/?id=10

台灣好行阿里山線B線(嘉義火車站往阿里山):http://www.taiwantrip.com.tw/Besttour/Info/?id=11

南投客運埔里、日月潭線:http://www.ntbus.com.tw/hsr6.html

清境無縫接駁:http://www.ntbus.com.tw/cjfm.html

嘉義客運:http://www.cybus.gov.tw/form/index.aspx?Parser=2,9,178

季宏旅遊-清境共乘:http://www.taiwantravelbus.com/together.php

OKBUS清境觀光巴士:http://www.cingjingbus.tw/

台灣小客車租賃:http://www.gotw-travel.com/gotw-04.html

KKDay台中直達清境共乘車:https://www.kkday.com/zh-tw/product/1756