每次去旅行都會有不少美好回憶，有時同女朋友睇番去旅行影嘅相，當刻畫面即時疑幻似真彈晒出嚟，有時仲睇到不自禁笑出嚟。
不過除咗去旅行嘅過程之外，仲有兩個情境令我非常咁感觸。
每次出發前，我總會約女朋友預早兩小時 去到機場 集合，check-in 完食個宵夜再上機（女朋友獨愛坐凌晨機）。不過，我同女朋友都係出名嘅遲到王，十次有八次……都係趕頭趕命 check-in 。
當我到達 機場 ，總有一種難以言喻嘅舒暢感，因為無論係朝早定夜晚，機場內一樣燈火通明，冇乜太大變化。作為勞碌嘅香港人，總係「望住時間」做人。可以放低晒手上所有工作，身處喺令人暫時忘卻時間嘅地方，未出發個心情已經輕鬆不少。
「點啊到未啊？」我問。
「走咗班巴士啊！差唔多到啦！」
「又話食宵夜……」
「求其食個杯麵算啦～」
我嘆一口氣，每次都係咁，匆匆忙忙塞飽個肚就上機……
終於，見到熟悉嘅身影拖住個巨型行李箱出現，我向佢揮手，佢彈彈跳咁走埋嚟。「快啲啦！趕唔切上機就大件事喇！」推住行李車急步去 check-in ，再跑去登機閘口，女朋友緊緊繑住我，兩人拋低所有嘢離開香港，總係有種私奔嘅感覺。
經過一輪血拼、瘋狂影相、飲飽食醉，懷住依依不捨嘅心情離開，眨下眼去到旅程尾聲，又返到嚟熟悉嘅香港 機場 ……
「好唔捨得啊～」女朋友。
「係啦……」我。
「如果落完機，可以一齊返屋企就好喇！」
每次攞住增磅幾倍嘅行李，加幾大袋戰利品， 去到機場 嘅巴士總站，女朋友都會咁講。由於行李太重，女朋友根本冇辦法上巴士，所以我會同佢搭同一架巴士，幫佢抬晒返屋企，望住佢安全入屋。
然後，我再一個人孤零零搭車返屋企，諗起同女朋友日夜相處咗一段時間，一擘大眼就見到佢喺身邊，一齊刷牙、一齊食早餐、一齊吃喝玩樂……
雖然唔係咩別離，隔幾日又會見面，但總係覺得有說不出嘅落寞……
Ig：BlueGodZi