女朋友豆姐非常細膽，想像力又豐富，夜晚經過人煙稀少嘅地方，連地上吹起舊垃圾都以為係屍體飄過。
但係！佢偏偏好鍾意玩鬼屋！
「感受下氣氛嘛～成個樂園都係鬼屋，氣氛好正啊！」豆姐話。
「但你平時行後樓梯都驚餐飽，同你行一轉後樓梯咪得囉！」
「唔同！嗰度有人扮鬼嘛！好好玩呀！」
於是，上年萬聖節就同佢去咗海海公園玩鬼屋。仲記得，第一間玩嘅係一間以學校為主題嘅鬼屋，排緊隊時，間唔中見到有工作人員扮鬼嚇人，同埋同大家合照。
女朋友興致勃勃撩啲鬼合照，話要集齊晒所有鬼嘅郵。我以為佢真係被樂園嘅氣氛克服恐懼啦！點知排咗半粒鐘入到鬼屋就見真章。
啱啱行入間校園鬼屋，女朋友已經捉到我隻手實一實，呼吸變得急速。
「喂你又話唔驚？」
「我冇驚啊！我怕蕩失路咋嘛！」
相信大家都知，香港鬼屋有個特色，就係你會見到前面嘅人，亦即係話你會知道幾時被嚇，邊度有鬼彈出嚟。所以，我一開始入到去就打算慢慢行，欣賞下周圍啲布置，而我見牆上面掛咗好多全班同學合照，合照上有血跡有鬼影……
「你睇下～啲全班合照張張啲學生都一樣，哈哈！」
「行快啲啦……好恐怖啊！」豆姐把聲好似唱緊歌震音咁。
「行咁快咪唔恐怖囉！知道晒啲鬼喺邊度出嚟。」
女朋友一聽到呢句，就一支箭咁扯住我衝向前，唔使幾秒，已經見到前面兩個玩家。
「你做乜啊？」
「前面有人，冇咁驚嘛！」
然後，我同女朋友就跟住前面嗰pair人一齊行，我完全見到晒啲鬼彈出嚟，再急急步伏埋去暗角位，仲有啲鬼嚇唔切我哋，好無奈咁同我四目交投……
不過，女朋友就非常投入……
「啊啊啊啊啊啊！」每次前面尖叫，豆姐就跟住尖叫。
「做乜啫，啲鬼都唔係嚇你。」
「好驚啊！」豆姐將個頭完全貼落我背脊後，不斷推我向前行。
佢根本睇唔到任何嘢，但又要驚，咁都算數啦！最慘係佢每次尖叫，都情不自禁使出「揸波龍爪手」，一嘢抓落嚟……
「啊啊啊啊啊！」痛到我尖叫，前面pair玩家以為我做乜大嗌……
去到鬼屋中段，我被女朋友推到不斷撞牆、不斷被鬼嚇、再不斷被揸波……
喺呢個時候，我見到面前有隻鬼不懷好意咁準備喺轉角位嚇我。
我已經滿身爪痕，受唔住更大嘅衝擊。於是，我一轉彎，就望住隻踎喺地下準備跳出嚟嘅鬼。
「求下你，唔好再嚇佢，我頂唔順喇……」我誠懇地請求。
「點啊～係咪有嘢彈出嚟啊～吓？！」豆姐。
隻鬼望一望我，又望一望我身後緊貼住我嘅女朋友。
然後，佢點一點頭，擺出OK手勢，畀我安全通過。
好幸運地，雖然件衫被女朋友扯到變晒形，身上又多咗無數爪痕，但最後都仲有命行出鬼屋。
「嘩～真係好好玩啊，好驚險啊～」豆姐。
「係……我都覺得好驚險……」
「咦！點解你成身爪痕嘅？唔通入面真係有鬼？！好恐怖啊！」
「……」
我想講，最恐怖嘅鬼咪係你囉！
我見女朋友咁鍾意玩鬼屋，又攬到我咁實，就千叮萬囑一定要我喺身邊先可以入去。
「梗係啦，同第二個我唔敢玩呀！」
唉～既然佢咁講，少少痛苦算得係乜，頓時覺得男人真係好偉大！
專頁：http://www.facebook.com/BlueGodZi
Ig：BlueGodZi