但有種人就剛剛相反，患咗「唔敢去旅行」病。呢種人嘅主要病徵，就係為咗「唔去旅行」，畀好多藉口自己，通常聽得最多有以下幾種答案。
「哪有錢」類
「邊有錢啊！去旅行咁貴。」其實只要肯搵下，機票同酒店都經常有優惠，撞啱日子幾百蚊就可以飛一轉日本、韓國，食少兩餐放題已經夠畀機票錢。
「香港乜都有」類
「挑，香港咩都有啦！使乜去旅行咁辛苦自己，又要搭飛機。」香港冇錯係好多唔同國家美食，但只要去一轉旅行，就知道咩叫原汁原味。舉個簡單例子，大阪章魚燒，第一次食完就知道香港冇乜可能做到呢隻味道。
「好忙啊」類
「冇，咁忙邊有時間？！」有部分極端分子，寧願將大假蝕畀公司，都唔捨得請假去旅行。當然啦！有好多公司都係唔人道的，明明有大假，就係唔畀員工放，但呢種文化某程度上，都係奴性重嘅香港人所造成，為咗份工去得太盡，無良老闆就愈來愈過分。
點解會「唔敢去旅行」？主要係因為錢同時間兩大問題，因為驚使錢會買唔到樓，又驚唔花更多時間喺工作上會被人迎頭趕上。但試諗下，成個人生就係為咗買樓同返工，又有乜意義呢？難聽啲講句，突然發生咗咩意外，當你回顧自己人生，全部都係儲錢買樓同返工，值得咩？
前排家父睇到報紙「傑青」上樓勵志故事，就開始向我發牢騷。「你睇下人哋幾叻吖！慳足幾年，年紀輕輕就買到樓。」（後來被踢爆係假新聞。）
幸好我早就估到老竇會咁講，我只好攞出之前準備好嘅報紙說：「你睇下人哋個老竇幾叻吖！畀600萬個仔上車，個仔每個月儲1,000蚊就得，幾勵志。」說畢，對話終結，兩仔爺默默吃早餐準備各自返工。
每個月儲錢其實唔難，但要我花幾年青春畀首期，唔睇戲唔去旅行，再用廿年供樓，冇錯，我係得到層樓，但就冇咗個人生。
所以，我要去旅行！
今時今日去旅行，飛機票有廉航，住宿又可以網上訂酒店，選擇豐儉由人。至於去旅行嘅使費，其實可以換個方法思考，譬如你好鍾意食韓式燒肉，但香港又貴，味道又一般。倒不如直接去一轉韓國，朝早去鷺梁津海產市場吃海鮮，夜晚去馬場洞食燒肉，食足一星期……往後你就唔會再想食香港嘅「偽韓燒」，一年去一次韓國，計落其實更慳錢。
若果唔去旅行係因為驚冇人伴行，其實可以話畀大家聽，一個人去旅行其實好爽的，時間、行程完全自由計劃，喺香港冇乜畀自己完全獨處嘅機會……
最後，若果你係為「將來」而唔敢去旅行的話，試諗下，他朝一日將你嘅人生故事話畀個孫聽：「咳咳～我畢業之後嗰幾十年，每日都係供樓咋！」恐怕個孫五歲就會對人生絕望，當場割脈自殺！