約旦除左有Petra之外,仲有個好出名嘅沙漠Wadi Rum,當到達Amman,我地先開始搵local tour,仲要第二日就出發,係tripavisor度搵呀搵,send左email去幾間agent度問,有一間好好,覆得好快,我地就即刻confirm啦!local tour係包去沙漠住一晚,因為無人會係無guide嘅情況下入沙漠先搵住宿架。 我地今次個tour加錢會直接送我地去Petra,係約旦玩,你多數包車,公共交通工具應該係唔係俾遊客用。我地亦都無嘗試過,可能去Petra都可以坐公共交通工具嘅,話晒個景點係世界七大奇景。
講番Wadi Rum先,由於我地無一早Book 定,係去到Amman 先大條道理咁Skype D 公司,只搵到一間家庭式經營的Local Tour,仲要晚上十一點幾先Confirm到, 司機一早7am就來接我地啦。坐兩個鐘左右,因為Amman朝早都會塞車,平時應該唔使咁耐,去到一個類似遊客中心大門就等沙漠嘅guide出來接我地,去沙漠當然要換番部四驅車啦!woo~展開我同大少今次沙漠小冒險。

約旦,Wadi Rum,黃心,中東,沙漠我地個司機
約旦,Wadi Rum,黃心,中東,沙漠

由大門飛奔入去我地個營地差不多半個鐘,全程我地堅持坐後面車卡睇風景,唔係講笑,你真係要包到實以防一面都係沙,沙漠四週個景雖然有D唔同,但我真係無辦法分辨方向囉,好快我地到左營地,住嘅係蒙古包型嘅tent,好保暖吓,營地有一間common room,係食飯同吹水,又有男女廁,會有暖水沖涼,都幾文明呀!
約旦,Wadi Rum,黃心,中東,沙漠
咁settle down左之後就食個quick lunch,有係中東你都一定會食到hummus啦,薄餅,生青瓜同蕃茄,少少肉,唔理得咁多喇,快D食完快D出發去玩。

約旦,Wadi Rum,黃心,中東,沙漠
上左四驅車去睇吓Wadi Rum真正嘅風光,一路都見到不同沙丘做成好多好靚嘅圖畫,第一個可以落車行吓嘅地方係Lawrance’s house,到左之後,你會見到半間屋,呢間屋係靠近懸崖起嘅,當然我都要拍吓到此一遊相啦!玩左一陣,我地又出發喇!
約旦,Wadi Rum,黃心,中東,沙漠

今次係個沙漠兜來兜去,哈,感覺都好新鮮,同Atacama(位於智利)個view係唔同,因為Atacama有植物,呢度真係一大片沙漠,只有仙人掌同乾到得番樹支嘅植物,同埋有部份沙漠D 沙係深紅色嫁!
約旦,Wadi Rum,黃心,中東,沙漠
我地第二個會停嘅地方係Umm Fruth Rock Bridge,呢度係一條天然嘅石橋,大約有5,6層樓高啦,我同大少二話不說就準備行上去,大少當然無問題啦,佢好輕鬆就上左中間,而我就非常論盡,行唔得,爬又唔得,正當我想放棄嘅時候,我地個guide唔容許我咁做,佢話一定上到去架,咁佢同大少一個拉,一個推,夾手夾腳幫我,其實真係斜架,我怕上左去,落就難,不過都上左啦,唔諗得咁多,過左斜坡,我就唔使人幫啦,穿過D大石,到達個橋頭,從高角度欣賞Wadi Rum,又係另一番風味,感激我地個guide真心幫我,唔想我miss左個咁正嘅view,之後我地過橋喇,個guide又充當攝影師,係上面睇景,影相,抖抖,爽呀!

約旦,Wadi Rum,黃心,中東,沙漠
紅色的沙漠,Red Sand Dune Area
約旦,Wadi Rum,黃心,中東,沙漠

落來時,我坐低慢慢落,都無想像中咁難,大少陪我安全落地,話咁快又上過去補影一D黑白相,我地係地面影吓佢,坐係車休息吓就再出發。
呢一轉遊車河,主要睇吓由岩石造成天然嘅畫,外加一D想像力,有鷹,有人像咁,都幾得意吖,之後佢送左我地去一間souvier shop,無強迫買嘢,只係要我地入去俾佢交差,間shop都係賣D工藝品,最特別係有當地人D服裝,我地試帶影相,佢地都無黑面,算OK啦,不過最後都係無幫襯。
約旦,Wadi Rum,黃心,中東,沙漠
最後個guide問我地想唔想tea一tea,我地當然歡迎無沙漠tea啦,佢就即場生火,由於太乾,佢只係用左半分鐘就起左個大火即場煲水,佢叫我幫手睇火,之後鬼鬼崇崇帶左大少去一邊話小解,哈哈,原來佢叫大少換左個酋長造嚇我,笑死我,都係想serve好個客,生意難做呢!跟住水滾,我地嘆吓茶,食塊餅,就回程結束呢個約3,4小時四驅車之旅。

約旦,Wadi Rum,黃心,中東,沙漠
立刻生火煲水
約旦,Wadi Rum,黃心,中東,沙漠

返到camp site,咁啱見到佢地準備晚餐D雞,估唔到個方法同我地去camp煮雞差不多,就係燒紅D炭,上面放個大煲,將D雞件放入個層架度,擺入個大煲,再埋番D沙,慢慢烤熟D雞,嘩,令人好期待晚餐呀!
約旦,Wadi Rum,黃心,中東,沙漠
稍稍休息之後,我同大少又要出發,出發去騎駱駝睇日落,好典型嘅沙漠節目,Yahoo~我地第一次騎駱駝呀!由另一個後生仔帶我地去,兩隻乖乖駱駝一早ready,大少騎隻大,我騎隻細嘅,坐上去係零難度,但當駱駝一起身,嘩,原來係離地好高架,好彩個guide提左我地要扶實個坐位前面條小柱,而駱駝亦行得好慢,你會慢慢搵到個平衡位坐好,之後就等佢慢慢行,有時隻駱駝掛住低頭食草,你個身就會自然向後,驚死跌我落來,我都還好,大少就慘D,因為patpat無肉,佢一路坐一路話痛,一定無下一次,哈哈,笑死我。行左半個鐘,其實唔係好遠,因為仲見到個camp site,駱駝真係堅慢,我地搵個好位坐低,慢慢欣賞咸蛋黃落係沙丘,感覺好完滿嘅一日,哈,又要回程半個鐘,只有大少不停講patpat嘅痛,哈。

約旦,Wadi Rum,黃心,中東,沙漠
騎駱駝
約旦,Wadi Rum,黃心,中東,沙漠

晚餐有好好味燒雞,有飯,有potato,大少超開心,因為係中東,真係無米到肚,今餐真係好實在咁飽,正呀!太陽落山後,沙漠開始清涼,camp site對兄弟係common蒙古包內起火,我地兩個,加一個美國遊客,3個guide圍住個火吹水,兩兄弟會打鼓唱民族歌,老豆同我地吹水,談了很多事,比如為什麼兩兄弟中細佬比較喜歡留在camp site,老豆結婚時請左差唔多一千人來飲。我地好鍾意呢種異鄉情懷,旅行有時就係想見識吓人地文化,和當地人談天說地,呢晚我地過得開心又難忘。

約旦,Wadi Rum,黃心,中東,沙漠
臨瞓前,我同大少都有睇星星,雖然唔係我見過最多星的一次,但地點轉左,感覺就唔同左,點都要睇吓嘅。夜晚沙漠好靜,偶然係camp site隻貓叫兩聲,只要鎖好門以防爬蟲類入房,我整晚都好好瞓呀!
第二朝一早要走人,好彩都睇一個非常靚嘅日出,真係不枉此行。
約旦,Wadi Rum,黃心,中東,沙漠

Wadi Rum我個人覺得係好值得去,整個中東D人我都覺得好商業,整係搵錢,做你生意,但係camp site嘅每個guide,佢地都好純,只係想你開心滿意,而且短短一日一夜有咁多節目,真係精彩喔!