我最鍾意嘅顏色就係藍色,所以平時郊遊特別鍾意去啲可以望到藍藍嘅天空同大海嘅地方。好多人認為,鍾意藍色嘅人就代表憂鬱、冷漠、負面、保守。其實在心理學上,藍色係一種代表可靠的顏色,令人有種安穩、信任、忠誠的感覺。 藍色係有助減少壓力、平靜、放鬆嘅作用,而且促進身心放鬆嘅顏色。 所以今次會介紹 5 個 香港藍色景點 ,令大家可以放鬆一下,又可以望到大海、藍天與白雲!

01 | 粉藍色浪漫情人橋-石澳海角郊遊區

「粉藍色情人橋」呢度係唔少香港人拍攝婚紗相嘅熱門地方,條橋主要係通往「大頭洲」一直行入去,仲有行山嘅路徑,上面有個觀景亭可以坐低睇下風景望下大海。


走上了這座大岩石上望著一片大海。海岸岩壁侵蝕的地貌,呢度嘅岩石已經歷咗1.4 億年嘅侵蝕喇!

如果假期唔想去多人嘅地方,呢個地方都係一個唔錯嘅選擇:) 影相,望著海,聽聽海浪聲,輕輕鬆鬆簡簡單單又過了一天 。
交通:應該點去呢?只要坐港鐵去到「筲箕灣站」,到咗之後去 A3 出口巴士總站,轉新巴 9 號巴士石澳總站落車,就到喇!

02 | 石澳龍脊遠足徑

企到龍脊最高,望落去可以睇到整個石澳、大浪灣及遠處嘅清水灣,望到 360 度無敵大海景。龍脊全程 8.5 公里,大約三小時左右完成,路途話長唔長話短唔短,對於我呢啲體力差嘅初級行山者,呢個地方都算係幾適合我呢個「偽山系」行下玩下。

猛烈嘅太陽在我頭上,好彩上到山頂都好大風,空氣都特別清新~上上落落上上落落,有段路都要花些少氣力,最後大家記得留意呀~要帶齊充足嘅飲品,因為沿途都冇補給點的

交通:去到港鐵「筲箕灣站」,之後去巴士站坐 9 號巴士去到「土地灣站」落車。

03 | 無敵海景+大草地 = 龍蝦灣

一直沿住龍蝦灣道一直行⋯⋯就會見到一大片草地,望住一大片草地,望住大海、藍天與白雲,終於可以靜靜躺在草地呼吸下清新空氣。其間有不少情侶來到這裡放風箏,一家大細來野餐,還有帶著小狗在草地遊玩。提提大家,呢度係冇士多、便利店,如果要野餐,記得買定入去啊~

呢個地方大家有冇覺得好熟口面呢?原來呢度係好多古裝片熱門取景勝地嚟呀。《男親女愛》主題曲「 藍 藍 天 空 高 掛 我 的 夢~ 」 嗰句,都係拍攝於龍蝦灣呀 :)

如果想繼續攀登,龍蝦灣背後還有一坐山「大嶺峒」,大家要攀登可以喺後面嘅龍蝦灣郊遊徑出發,大約一個半小時就到達大嶺峒山頂,繼續向前行就是龍蝦灣郊遊徑的終點 「大坳門」。

交通:我由鑽石山港鐵站坐91號巴士去到「大坳門站」落車。

04 | 機場跑道尾

相信自從啟德機場搬到赤鱲角機場,很多人也很懷念飛機在頭上飛過的感覺,還有飛機發出強大的引擎聲音。嗰度仲有一片大草地,可以瞓住喺度望住一架又一架飛機,起飛又降落。不知不覺,這裡可以逗留一整天。

只要天氣好,呢度點影都係咁靚!


 

等到黃昏嘅時候~仲可以睇埋日落先走!下次再嚟一定會踩單車過嚟!可以一邊踩單車一邊欣賞沿途嘅風景!

交通:去到東涌東薈城,下面的巴士站坐 S52 號巴士去到「飛機維修區」落車。落車後沿路行番轉頭大約10分鐘左右就會到機場跑道尾

05 | 香港國家地質公園 = 大埔三門仔、馬屎洲自然教育徑

往三門仔新村方向行..行..行~三門仔係一條漁村,村民以漁排及養殖魚類為生。所以有一個「漁民生活文化展覽館」,係介紹三門仔漁民生活。再一直行經過一排兩層高的村屋後,登上山坡再行就可以去到目的地「馬屎洲特別地區」,呢度係屬於香港國家地質公園。

 

馬屎洲有大量超過 2.8 億年的古老岩石,係大埔區吐露港內的一個小島。沿途可觀察有趣的岩石、海洋生物,水質都很清澈。呢度望到藍天白雲,又可以望到大海,石灘對面是馬鞍山。回程嘅時間可以睇埋日落先走,輕輕鬆鬆又過了一日。