與其話今年係猴年，不如話係澳洲年喇！澳元低水，香港人又愈嚟愈想去啲遠離煩囂同有生活質素嘅地方叉下電。嚟到2016年，旅遊界有好多朋友都煲緊澳洲，我哋霏雲闖蕩都去完澳洲返嚟，第一站去咗Tasmania仲拍埋Video，個trip既有比手掌更大嘅生蠔食、又去埋全澳洲唯一嘅地下公園睇有如鬼斧神工嘅鐘乳石，一定要同大家推介！

1. Curringa Farm農場牧羊初體驗

呢個農場係家族生意嚟，有百幾二百年歷史，最新一代接班人仲搞埋生態旅遊生意，起咗度假村，嚟玩嚟住就可以體驗到牧羊、種樹、食靚牛扒，睇埋農場主人表演光速剪羊毛，好多嘢玩。

廣闊嘅農場入面，老闆阿Tim起咗又靚又舒服嘅度假村，訪客可以開開心心體驗農場生活。

 

2. 即撈即食荷伯特超正海鮮


喺Tasmania梗係要出海啦！呢個Tasmanian Seafood Seduction船河之旅就係最佳選擇，出海睇下三文魚養殖場，仲有潛水員野生撈新鮮鮑魚、海膽同生蠔，再即席喺船上歎埋，頂級享受啊。


超新鮮海膽，睇見已經流晒口水喇，到而家我哋仲回味無窮呀。

有乜嘢爽得過食海鮮大餐？就係喺漁船上面睇住靚風景食海鮮大餐喇！

下一頁：登海拔4,000呎睇全市靚景！

 

3. 登海拔4,000呎睇全市靚景

怕暈船浪？得，去Mt. Wellington吧，只須20至30分鐘車程，山上面仲有個展望台，上到去你會發現好值得，因為喺山上面你可以睇晒全個荷伯特，好壯觀㗎。

就憑呢個View，已經值得你登上威靈頓山啦！

4. 萌爆野生動物　零距離接觸

睇咗咁多風景，係時候睇返啲識郁嘅嘢。呢個Bonorong Wildelife Santuary其實係一個收容所，好多意外受傷嘅野生動物都會喺呢度療養，好有愛㗎，一邊又可以同遊客玩下，無咁悶吖嘛。

入面除咗樹熊、袋鼠呢啲動物明星，仲有好珍貴嘅袋熊同Tasmania嘅代表Tasmania Devil，想見佢擘大個口嘅招牌搞笑樣？睇片啦！

面對萌爆嘅動物們，我哋真係覺得心要融化了。

下一頁：買手信必去！南半球最大薰衣草園

5. 買手信必去　南半球最大薰衣草園

呢個農莊我哋女士走唔甩㗎啦，浪漫放閃嘅不二之選。之所以能夠種到咁靚嘅薰衣草，當然係同氣候有關啦，而家呢個農莊仲成為好多人影結婚相嘅熱門地點添，加埋有好多唔同花款嘅薰衣草產品，啱晒買手信俾姨媽姑姐。



除咗美景，記得買埋花款多多嘅薰衣草產品做手信喇。

 

6. 油畫小鎮尋找陳奕迅真跡

面積唔大嘅Sheffield小鎮，家家戶戶都畫咗同Tasmania有關嘅油畫，喺鎮入面散步，就好似行緊個超大型畫展咁，仲要免費，去邊度搵？而且連Eason陳奕迅都喺呢度留低咗一幅大作，即刻睇片見識下啦。

呢幅就係全鎮天字第一幅作品，去到記得欣賞下。

當然，另外都仲有好多值得欣賞嘅佳作。

下一頁：玩埋地底！探險全國唯一秘景

7. 地下遊　全國唯一地底公園

Tasmania嘅地面、海面同高山都探索咗好多喇，係時候玩埋地底！Mole Creek Karst National Park係澳洲唯一嘅地底國家公園，入面嘅鐘乳石壯觀到不得了，而且仍然「發育」緊。仲有啊，為咗俾遊客見到洞裡面出名多嘅螢火蟲，園方定時定候會搞特別活動㗎，睇片話你知啦。


呢個鐘乳石洞，只可以用兩個字形容：正啊。

 

8. 影相發燒友探秘　二百年歷史世界自然遺產

搖籃山被列入世界自然遺產，可以話係澳洲人最自豪嘅國家公園之一。成個環境保持住一種原始森林嘅狀態，好神秘、好有Feel，誇張啲講，直頭係一個渾然天成嘅中古電影場景，係呢度影返輯相，肯定呃晒啲Like啊。

 

後記

我哋喺澳洲嘅video內容好豐富，寫都寫唔晒，大家記得睇埋原片，睇完片記住去埋 EGL Facebook fanpage 玩有獎問答遊戲，獎品係總值超過HK$10,000嘅澳洲旅遊禮券同澳洲特色紀念品，唔好錯過啊。

識玩嘅你仲唔即刻登入EGL Facebook或以下網址贏取豐富獎品：
http://www.egltours.com/fit/160119_gotrip_web.edm

Tags :