旅遊記者做稿之前,都會先在網上進行「大起底」。不過齋睇網上推介,總會遇上一兩個「超級驚喜」!好似我之前在越南河內,其中一站到訪Airbnb推介以下這間民宿。民宿標榜入住當地藝術家屋企,有埋靚靚樹屋等多款房型可揀。但踏入民宿一刻,身穿緊身鮮藍色露臍裝的屋主Khanh親身迎接,呢個moment我諗起從前有一隻鳥,叫「金翅中伏鳥」!

採訪:Yuki|拍攝:2Tung @ 新假期周刊

記者第一印象

airbnb_vietnam_treehouse19

Airbnb上面標示呢間樹屋價錢只係$439一晚,兩人入住,每人每晚只需二百零蚊就可以咁親近大自然,抵喎!睇到啲相仲覺得好有風味,成間屋都被樹木包圍住,環境清幽又充滿文藝氣息,啱曬我呢啲文青。設施方面,屋主又話有個勁大花園同埋BBQ設施,好似都幾齊全。唔使諗,就book呢間啦!

▼可按圖放大▼

 

評分都有文化差異?

房客網上評價一律讚好,但清一色西方客。要過夜,香港人就未必接受到!事關屋主鼓勵客人親近自然,屋內只有簡單擺設及床褥,洗手間、餐枱都在戶外被茂盛樹木圍繞,如同被逼置身餓蚊大本營。唔計住宿設施,屋主Khanh好熱情,會著上露臍戰衣帶住客四圍玩。問到他會否介意路人目光,他大方表示世人皆醉我獨醒,He doesn’t care~仲問我整唔整返件?!加埋臨走他在耳邊送上的goodbye kiss,真係令我呢次河內之旅充滿「驚喜」!

airbnb_vietnam_treehouse5
民宿主人Khanh從事行為藝術工作,個性獨行,連衣著都超有個人特色。每日穿上親自設計,不同的鮮色緊身露臍斗蓬裝,懶理世人目光。有幸入住,他都會穿上呢身戰衣,帶你周圍玩!

型格樓梯危機四伏?

airbnb_vietnam_treehouse6
上樹屋的梯級好斗峭,仲級級都好窄,有幾級仲要坐住落。放唔到行李不特止,夜晚出去廁所完全唔夠光,步步驚心啊!

紅色地牢房 缺通風大陣除

airbnb_vietnam_treehouse7
在2米深地底的地牢房以紅色作為主調,牆身掛滿鐵鍊,但藝術嘅野,我識條鐵鍊咩?我淨係知地下通風唔多好,間房好大陣除!攝影師在地牢逗留10分鐘,爬埋條危危乎的梯,已經焗到暈。

下一頁:樹屋的理想與現實?

airbnb_vietnam_treehouse11
Airbnb網站上面睇,屋主同住客坐在屋內談心,環境非常舒適。(圖片來源:Airbnb)

airbnb_vietnam_treehouse13
網站上睇間屋入面有不少擺設,頗有情調。(圖片來源:Airbnb)

airbnb_vietnam_treehouse8
現實係樹屋樓身較矮,女仔在屋內亦要全程彎腰。

野外露出淋浴間?

airbnb_vietnam_treehouse12
網上睇到的淋浴間,雖私隱度不高,都叫做有瓦遮頭。(圖片來源:Airbnb)

airbnb_vietnam_treehouse9
現實中,除了基本的室內淋浴設備,Khanh特別設計多個戶外零遮掩、零私隱的淋浴裝置,好讓住客可以邊沖涼邊感受大自然。他透露不少外國客都好鍾意野外露出,但我作為傳統小女子,真係睬!

評分(5粒星為滿分)

周邊環境:★★☆☆☆
距離市中心15分鐘車程,附近無咩靚景點,係民居爛地
房間環境★★☆☆☆
中伏樹屋同中伏地牢真係不敢回想,另外兩款基本房型會比較好少少(但影相唔靚)
設施:★★☆☆☆
樹屋都有冷氣,但樓梯位略污濁。戶外環境又多蚊又暗
影相位:★★★★☆
影相呃到人,戶外仲有個掛喺大樹到的鞦韆,玩就唔好玩,但影相靚
美觀:★★★☆☆
成間屋入面都放晒屋主藝術品,裸體石雕,同埋佢好鍾意的重口味鐵鍊,可見藝術嘅嘢好個人化

河內樹屋B&B

價格:US$62/HK$481晚,包每天早餐
地址:No.7, 462 Ngoc Thuy Alley,Hanoi