之前我寫過一篇關於空姐人工嘅文章,睇過嘅都應該理解空姐人工其實唔高,見到不少網民留言話萬二三蚊其實唔少,睇下你自己點睇啦,其實我就無話少嘅,只係想釐清返外間以為空姐人工好高嘅誤解姐。不過我都好想 fair啲咁講返,空姐福利又真是不賴的(速逃)。睇下你哋今次又點睇~

1. 一折機票


我諗長期令人葡萄嘅空姐福利一定係一折機票。解釋一吓啦,一般嚟講空服員自己可享有無限一折機票,價錢以正價打折計算,另加機場稅、燃油附加費、嚟緊加埋跑道費等等。每位未婚員工都可以幫一位朋友申請呢項福利,另外父母亦同時享有,親友每年會有六張一折機票可用。不過留意返,員工機票擁有最低上機優先權,無位就要喺機場無了期咁等,所以我地通常淡季先會去旅行。

2. 假期特多

入職過咗試用期後就可享有法定 21 日有薪大假,加埋前後的保證連假,每年就有 28 日大假,做滿 5 年又會多 3 日大假。而每月假期就人人唔同,depends on 你個更表,少至 8 日多至 15 日,所以你話空姐多假呢樣嘢,真係無花無假。只不過,多假又點,閒日放假其實無人陪到你,所以其實好多空服都好宅的。

3. 醫療津貼

每位員工都會有張醫療卡,好似一般醫療保險卡咁,去公司指定診所、醫院睇醫生唔使俾錢,當你用到某一個限額時(睇番你自己揀咩 plan),就要自費喇。已婚員工嘅醫療津貼仲包埋配偶添。不過因為公司近年 cut cost,員工嘅醫保已經無以前咁好,非公眾假期時員工只能夠喺非繁忙時間睇急症,一係就自己俾錢。

4. 機場員工優惠

因為空服員都屬於機場員工,所以可享有所有機場員工優惠。例如機場員工八達通,搭機場快綫、機場巴士都會比正價平啲。另外只要著住制服或出示員工證,喺機場任何一間餐廳食嘢都會有員工折扣,我最鐘意去機場間翠華食沙嗲牛麵~

5. 免稅品優惠

最後關於買嘢~ 首先公司本身有offer 員工折扣,大部分機上免稅品都可以喺公司買得到。另外空服員只需要出示員工證,喺全香港任何一間免稅店都可享有購物優惠,好正正。

睇到呢到,係咪都問緊自己一句:去做空姐好嗎?過來人好沉氣好老土咁話你知,唔好淨係見到份工好嘅地方就盲目以為係會啱自己呀!需知道呢個世界係唔會有免費午餐!總之聽多啲,睇多啲,先好投身一份全職工作,祝閣下好運囉!

PicsArt_06-16-08.38.06

頭盔:魚翅先係咁架咋,其他航空公司我唔清楚架。