去旅行最重要一環梗係間酒店啦!啱啱落機拎住大舊行李,仲唔快啲去酒店check in 兼休息一下?但遇上酒店實景同官網圖片相差太大,入住時酒店格局變賓館,自己酒店自己揀,真係喊都無謂呀…杜遊珍出差多年,同一班姊妹偶爾都會遭遇 酒店甩轆情況!

01) 「靠嚇」保安


講甩轆又點少得強國,行家F有次暢遊廣州天河,入住一所3星酒店,但引起佢注意嘅,係門口保安亭竟然36小時都有保安員on call,F心諗,細細間酒店嘅保安系統都如此周詳?素知大陸除咗賊之外,仲有幾多嘢係真?F住到第三日忍唔住去保安亭望下,駭然發現一直坐著嘅只係一個人偶!原來酒店濫竽充數搏大霧,放個公仔阻嚇賊人(嚇埋住客),有起事上嚟真係叫天不應叫地不聞!

酒店甩轆
圖片:網上圖片

02) 非洲水舞間

行家C有次去納米比亞影野生動物,一向麻甩嘅C對非常有非洲風味、用茅草同石磚搭成嘅所謂「酒店」表示唔介意,仲話入鄉隨俗,要體驗當地人生活,酒店經理亦拍晒心口,話茅草冬暖夏涼,當時正值夏天,夠晒通風,唔使冷氣唔使風扇。結果呢,真係唔慌唔涼喇,因為嗰晚落大雨,茅草搭成嘅屋頂形同虛設,自然全間房濕晒,C成晚只能左閃右避搵一個無咁濕嘅位瑟縮一角,真係要問句,「唔通連個天都唔鍾意我?」

圖片:網上圖片
圖片:網上圖片

03) 屈身劏房

最後,係我杜遊珍親身經歷酒店甩轆慘事,上年去台灣採訪一間5星級豪華酒店,事後公關話酒店 Booking 爆晒,唔好意思要我住佢哋集團旗下另一間酒店,阿珍心諗同集團應該都唔會差太遠,點知竟然係一間「賓館」格局嘅地方,入到房,一大股怪味,房間細如劏房,扭開電視竟然播緊無格 AV 呀!啋!此時阿珍已知呢度係咩事啦,惟有拿拿臨熄電視熄燈早啲瞓。唉,估唔到身嬌肉貴嘅我都有咁嘅一日!

酒店甩轆
遇上活動空間等於零嘅套房,瞓一晚都覺得唔方便呀!(圖片:網上圖片)