近日天氣熱到令人坐立不安,體溫節節上升,必須不時怒啪雪糕雪條解鬱抗悶。而一海之隔嘅澳門最近又有咩人氣冰品消下暑呢?交畀我澳門地膽三口八胃為出晒汗嘅大家開心 share 下 澳門甜品 啦!

01.連乳酪都係自家製|冇負擔天然乳酪雪糕


離大三巴不遠嘅「The Waltz Frozen Yogurt 華爾兹乳酪雪糕」主打每日以自家製乳酪加工而成嘅純天然乳酪雪糕。一試最多食客擁戴嘅「華爾茲」,雪糕奶味同酸味並存,開胃又順口,食落就好似華爾茲舞步咁輕盈,配埋健康嘅燕麥脆脆同新鮮生果,一個人獨霸成杯都唔覺得有任何負擔。
IMG_1400
招牌乳酪雪糕華爾茲 (MOP46)

IMG_149969

店主Ruby同老公去旅行時,被各地frozen yogurt嘅文化喚起咗一顆創業心。Ruby有呢個意念後,更毅然放棄護士工作,由零開始咁學習點樣製作乳酪雪糕,今年一月就正式開咗呢間屬於自己嘅乳酪雪糕店。

IMG_1472
盛夏光年 (MOP46)

The Waltz Frozen Yogurt 華爾兹乳酪雪糕

地址:澳門關前正街37號地下
營業時間:11:00am – 8:00pm (逢星期二休息)
溫馨提示:與大三巴、新馬路同區,行過去快嘅話15分鐘內搞掂,另外坐18號巴士至草堆街落車亦可。

02.文具店內嘆盡各款猜不透嘅玩味雪糕

集合室內野餐、睇展覽、聽音樂、作藝術、醫肚餓、買首飾文具於一空間嘅Roomage 30,其雪糕口味次次都為我帶嚟無盡驚喜,仲稱職過男朋友。曾推出過嘅雪糕口味包括眼淚味、小時候味、綠巨人味等等,剩係聽個名係完全理解唔到佢咩葫蘆賣咩藥,真係要親口試過先揭到秘,慢慢更成為咗呢度嘅潛規則,問職員都解答唔到你。

IMG_1455
小時候味 (MOP29)

IMG_1456

眼淚味 (MOP29)


IMG_1448

夠薑味 (MOP29)

13884308_278204775888999_2032135139_n

Roomage 30 空間叄拾

地址:澳門高士德區高地烏街 64 號東方花園商場地庫
營業時間:12:30pm – 7:30pm (逢星期一休息)
溫馨提示:位置就喺東南亞美食林立嘅三盞燈附近,食完魚湯粉去又得。由港澳碼頭坐12號至高士德落車再步行約10分鐘。

3.來一口冰極抹茶香

開業不久嘅汴京茶寮,完全係新橋區內嘅一片清泉,以發揚茶藝精神為本,拒絕跟大隊,唔賣珍珠仙草奶綠多多乜乜乜,卻憑住原片天然茶葉,為惜茶之人供應即場沖泡各式茶品而聲名大噪。而五月份仲推出咗店家自製嘅宇治抹茶雪糕,雪糕入口茶味濃郁,特別在佢入口後,屬唔係好滑溜順口嗰種,如圖所見,佢冰感偏重,食落好清爽有質感。


IMG_1452宇治抹茶雪糕 (MOP35)

IMG_1453

汴京茶寮

地址:澳門新橋三盞燈三龍閣地下B舖
營業時間:11:00pm – 11:00pm
溫馨提示:直頭開正喺三盞燈一帶,亞利鴉架街巴士站正對面。

04.由澳門過條橋就有得食嘅北海道名物

Snaffle’s 除咗北海道名物Catchcakes輕乳酪蛋糕外,5.4 北海道極上牛乳軟雪糕都係推薦之一,以北海道牛乳製成嘅雪糕香甜滑軟,嗰股奶香濃郁到下世紀都化唔開。

IMG_1475

北海道牛乳雪糕 (MOP38)

Image-1-1


 抹茶味Catchcakes (MOP125 /4個)

Snaffle’s Macau

地址:澳門氹仔水鴨街15號C
營業時間:10:00am – 10:00pm
溫馨提示:氹仔手信街(即地堡街)附近,新馬路坐33號巴士去嘅話,謹記喺官也街落車。

05.澳門本地學生最愛|配料落得最爽手

喺澳門話題不斷嘅Yogo Macau,受歡迎唔係冇原因。呢兜配料full爆嘅乳酪雪糕性價比的確高,事頭婆落配料嘅功架直頭係可以用豪邁闊綽嚟形容,永遠有多冇少,好似有鋪癮咁,一疊啲粟米片呀生果呀棉花糖落兜乳酪雪糕度,就會煞唔到掣,有圖有真相。

IMG_1443

乳酪雪糕口味每日更新,跟兩款配料。(大size MOP28)

Yogo Macau (海富店)

地址:澳門鮑思高圓形地11號怡昌花園地下
營業時間:11:00am – 11:00pm
溫馨提示:喺二龍喉公園附近,食完可以坐下澳門唯一嘅纜車,亦可能係全世界最短嘅纜車。

06.意大利空降到澳|雪條形嘅gelato同鮮果雪葩

經過親玫瑰堂一帶,總會見到有人手執一碌以意大利雪糕或鮮果雪葩化身而成嘅雪條,今日終於忍唔住要隊番條成為佢哋嘅一分子。展示櫃上嘅雪條琳琅滿目,口味有朱古力、香橙、芝麻、北海道牛奶、開心果等下刪一千字。顏色好比Photoshop個色盤咁豐富。

Image-1
三色雪葩 (MOP35)

點選心水雪條後,唔需要加錢已經可以揀朱古力脆皮同果仁配料,貪心鬼上身嘅我揀咗清新宜人嘅三色味雪葩,咁就可以故作精明咁一次過試晒菠蘿、草莓同奇異果味,然後再貪到盡加埋朱古力脆皮同粒粒。明明店員已經一再提示我:「建議雪葩唔加朱古力脆皮就咁食。」但我以一貫唔執輸嘅作風拒絕咗佢嘅好意,下次會記得醒水,因為奶類雪糕加脆皮比雪葩夾好多。

IMG_1459


蜜瓜味雪葩(MOP35)

IMG_1460

雪糕披薩 (MOP48)

Stickyhouse

地址:澳門大堂巷10號B-C和翠台地下B
營業時間:10:00am – 10:00pm
溫馨提示:喺新馬路/玫瑰堂附近,食完雪條可以沿住條衰鬼斜路行上大堂,個景睇得下。

07.踩過界|法式餅店新推手工雪糕

以法式蛋糕、麵包同馬卡龍見稱嘅Cacao Patisserie ,近日再涉獵多一個範疇:推出每日新鮮製造嘅手工雪糕。雪糕款式冇固定,咩口味用邊款生果由師傅設定,暫時推出過嘅口味有綠茶芒果、士多啤梨雲呢拿、朱古力同車厘子芝士等等,可謂陸續有來。

IMG_1466
綠茶芒果味雪糕 (MOP45)

試過綠茶芒果,兩種口味並唔係無分你我咁混埋一齊,而係迷彩式咁呈現出嚟,芒果味極香濃,綠茶味散出淡淡茶香,兩者平衡合體後甜度得宜。另外,店家亦都好鼓勵客人打開心扉咁贈下建議,擴大佢哋嘅雪糕口味數據庫。既然係咁,我唔客氣㗎喇!希望我心愛嘅百香果味可以盡快上場啦!

IMG_1457

朱古力味雪糕 (MOP55)

IMG_1467
士多啤梨雲呢拿 (MOP45)

IMG_1458

同場加映精靈球造型嘅士多啤梨芝士蛋糕。

Cacao Patisserie

地址:澳門渡船街75號地下A座
營業時間:12:00nn – 8:00pm
溫馨提示:可以由新馬路坐8號A到永樂戲院落車,再步行8分鐘。

下一頁:澳門傳統冰室、茶記 9 大推介

延伸閱讀

澳門 9 大星級靚景泳池比拼

澳門超大杯 Freakshakes 奶昔

澳門 4 大消暑甜品冷飲推介