古語有云:「識人緊要過識字」,不過 行山 郊遊,就一定係「識路緊要過識人」。前兩日有網上山友跟團行山,點知脫隊,結果失踪 14 個鐘之後逃出「險境」,網友就虛驚一場。

事後,組團嘅網上群組,與迷路山友嘅朋友,互相指責對方,誰是誰非,我亦不便多言。總之,雖然要勞動到消防員出動搵人,不過最後人無事,都算係大團圓結局啦。

而呢件事,亦激發唔少 行山 友對於迷路嘅討論。綜合大家留言,雖然話 行山 呢項活動唔應該單獨進行,但如果真係同隊友走失,自己唔識路,咁可以點做呢?

  1. 先定義「迷路」:唔知自己喺邊,唔知自己下一步點行,就算係「迷路」
  2. 如果對前路有懷疑,第一時間停止前進,飲啖水先
  3. 叫自己冷靜。心一慌人就會亂
  4. 打開地圖(行山 ABC 第一項守則,係要帶地圖、指南針、電筒同哨子呀!),或搵網上地圖,試下確定自己位置。
  5. 如對自己位置漫無頭緒,情況許可下第一時間離開密林,走到較廣闊道路。同時細心留意附近有否人工設施(如街燈、路牌、石屎路)。部份設施,如街燈,救援人員可輕易確定你嘅位置。

6.如大概知道自己位置,而體力上亦可應付,可繼續前進(走到大路、村落)。也可以選擇走回頭路
7.定時飲水及進食,保存足夠體力
8.一個人行走嘅時候,小小受傷足以致命!所以切記行走以小心謹慎為上,切勿急進,以免受傷
9.移動後若情況與想像有偏差,就不要勉強。搵個舒服嘅位置休息,並致電報警
10.將你所處位置嘅任何所見話畀救援人員知,資料越詳細,越有助佢哋搵到你。手機有電,亦可影相 send 畀救援人員
11.報警後,熄咗手機嘅數據、wifi、GPS 等功能,保留電力。(記得開住通話功能,救援人員會定時打電話畀你)

12.可於高處(如大樹)掛上顏色鮮艷衣物,以方便救援人員搵到你。有哨子亦要定時吹出求救訊號(三長、三短、三長)
13.耐心等待救援人員。記住,你行咗四個鐘,救援人員都要行四個鐘搵你。

報咗警之後,救援人員會去你報出嚟嘅地方搵你。你自己既然迷路,就唔好懶醒咁以為可以搵到路會合佢哋。記住:留喺報案嘅地方靜心等候

裝備方面,我都明白今時今日未必人人會帶地圖指南針,不過至少自己都拎啲水拎啲嘢食,手機跟身,同埋有後備電源。萬一脫隊,你都可以自己救自己。

(特別鳴謝「樂山行」Thomas Chan網友,你嘅意見非常有用!)