近年,愈來愈多香港人以「返鄉下」形容去泰國旅行,我亦唔例外!不過時裝精朋友立即挑機 mode上身:「要做泰國人?咁你夠唔夠膽在 曼谷飛髮 先?」眼見哈韓的他多次炫耀在首爾恤髮的成果,自認是泰國粉絲的我,又豈能怠慢呢?於是我決定帶著Google Translate上路,去到泰國星級潮人salon飛髮!究竟會否一如所料成為泰國潮人,定係……

泰國top 3潮爆髮型屋

開業一年多的 Smile Club Hair Diner,睇Ig發現到訪人客以潮人居多,大老闆Sunny仲係G-Dragon老友!我不虞有詐,立即託當地朋友預約。語言不通加文化差異,內心著實熬底,堅係擔心自己會變「彌敦道9號」!幸好到訪當日勁lucky,碰到明星小鮮肉老闆Toni睇舖,少女心即刻亂撞加尖叫。Toni身分特殊,明星御用髮型師只係兼職,正職係泰國演員,由於演藝事業如日方中,他於年前已宣布封刀,今次他派出chok爆髮型師Dom操刀。


到訪人客以潮人居多,唔少都係名人及model。

壓力測試篇

為了令自己加倍安心,我決定飛髮前即席進行飛髮測試,我先攞3個離晒譜髮型問Dom意見!


Dom話嬰兒肥人不宜剪bob頭(佢真坦白)!

妄想剪女神頭的我,被Dom以「亞洲人士輪廓唔突出」為由拒絕。


至於dreadlocks頭唔係唔整得,不過需要預約先做得!總括今次測試,3 個造型佢都統統 say no,合格啦!

飛髮實測篇

Step 1 ) Google Trans 唔到!

由於全場冇人講英文,我跟 Dom 全程用 Google Translate 溝通,不過他好像似懂飛懂的,而 Google 的泰譯中服務亦不太準確,我將關鍵字「瘦面」Google Translate成泰文,即惹來全場人爆笑!

Step 2) 「德州電鋸的聲音在我耳邊盤旋……」

全程包埋洗剪吹大約花了2小時,感覺同香港剪差唔多,為咗營造視覺效果,Dom 就特別喺髮型方面搞「花臣」,諗到 undercut 加 set 頭兩種玩法,等我多點變化咁話,抵讚嘅!佢花了半小時將頭髮劃分成好幾個區域,然後便一刀切剪掉我 10cm 的長髮!當我後尾枕感到一絲涼意之際,他突然亮出電鏟來,恍似德州電鋸的聲音在我耳邊盤旋,依家諗番都覺得自己大膽!

Step 3) 伏味 set 頭

剪到尾聲,Dom 更主動送上 set 頭服務,怎料這竟是中伏的開始,為讓世人看見我的 undercut , Dom 竟幫我紮起馬尾來,塊包面一覽無遺!頂……唔順的我決定放下頭髮,驚覺自己跟韓劇的阿豬媽有幾分相似,望多兩望,同行友人竟然話我似華英雄,幾乎崩潰!返到酒店我即刻洗頭,見到頭髮直番晒,個心先定落嚟!

記者有感:以身試「髮」 | 飛髮報告

如果閣下夠貪玩,就不妨試下set頭,頂多千零泰銖,都係得意同抵玩嘅,加上salon打卡呃like位都多,心思思又想試的朋友不妨由set頭開始,起碼有得返轉頭吖嘛!如果自問夠喪兼識泰文,就梗係打去搵 Sunny 剪頭髮,出動埋老闆,個價其實同香港差唔多,不過咁,好睇同潮向來都主觀嘅,潮嘢又通常都係欺負平民百姓嘅,如果你同我一樣,覺得頭髮好快長冇有怕,其實一試無妨。

<Before & After(華英雄)>

   VS    

 

Smile Club Hair Diner
地址:Soi Ekkamai 10, Khlong Tan Nuea, Vadhana, Bangkok 10250
營業時間:11:00am-8:30pm
費用:THB 900 (洗剪吹) /HK$199、THB 5,000/HK$1,104 (漂染)
網址www.facebook.com/smileclubthailand/
交通:乘BTS到Thong Lo站下車,轉乘的士約15分鐘。

延伸閱讀

【泰國 | 曼谷】美景與美食的饗宴!泰國浪漫河邊晚餐! | KKday

泰國 | 遇上怎麼辦?應付 曼谷黑的 4 種方法 | 尼克。流浪看

曼谷新玩法:到「泰式料理廚藝學校」學煮菜!|KLOOK