細個中學嗰陣約暗戀對象行年宵真係好浪漫:)「年三十維園行年宵」,可能剩係聽到都已經覺得迫,但係偏偏又會有好多人選擇一齊去熱鬧下,行年宵市場呢個活動,或者對於唔同人都有唔同目的同感受。

有啲一家大細嘅,可能純粹食完飯去散下步、買下嘢,而情侶就拍下拖、放下閃咁,而即使大家都唔怕凍,但有一樣好肯定嘅,就係大家都會好怕迫。

NEW-YEAR-MARKET-1

年宵約會好機會 與暗戀對象一齊迫

雖然「 I am a Big Big Boy, In a 『迫迫』World」,但「行年宵」對於我嚟講又有另一種回憶。有次同朋友傾開計講到中學行年宵,原來大家都不約而同試過約暗戀對象出嚟。

「嗰陣真係幾萬隻小鹿一齊亂咁撞,雖然係就係迫咗啲,但真係好開心。」

「你講緊中學嗰陣約Yuki出嚟個次?」

記得嗰陣呢個死仔係咁「現場直播」畀我聽,講佢由約出嚟去到點樣迫下迫下咁就慢慢拖人隻手仔,仲話呢種曖昧得嚟又刺激嘅感覺,真係一世都記得 (不過,今次我認同佢)。

圖片來源:Malcolm Koo (CC-BY-SA 3.0)
圖片來源:Malcolm Koo (CC-BY-SA 3.0)

難忘年宵之約 只想找機會單獨出街

「係呀,嗰陣嘅感覺真係好難忘,可能細個嘅時候都係純純的愛,加上新年凍凍哋嘅氣氛,真係覺得好鬼浪漫。」

呢個時候諗番當日嘅情景,都仍然好懷念嗰種感覺。雖然自己真係唔鍾意多人、唔鍾意迫,但偏偏又會主動問對方想唔想行年宵,或者嗰陣都唔明自己點解會咁樣做。但原來最後發覺,其實約你行年宵市場,都只係想搵個藉口約你單獨出街:)

PS: 朋友:「以前中學去真係超級浪漫,但結咗婚就真係超級怕。」Haha。

fb:熱豆腐仔