公司規矩 定出嚟總有原因,但合唔合理呢就見仁見智。老細多數都覺得自己諗出嚟嘅規矩係有根有據,可以提高員工效率,令公司業務蒸蒸日上!作為 打工仔 嘅你,冇權冇勢,又遇著個唔肯聽意見嘅老闆,除咗東家唔打打西家以外,唯一可以做嘅就係硬食。以下 15 條令人崩潰嘅 公司規矩 ,睇完最多都係呻下,跟住咪又係繼續做!你話係咪好令人崩潰先?

01 | 每次去廁所唔可以超過X分鐘


網上曾瘋傳咗張「員工守則」,每日返工只可以去廁所 4 次,夾埋仲唔可以超過 15 分鐘。求神拜佛唔好食錯嘢搞到個肚唔舒服啊!唔係你幫自己包屎片算啦!

1438435852_4821
除咗完風要即時開工,早年網上試過流傳嚴苛的「執貨員工」守則,寫到明「中午飯前只可以申請去兩次洗手間」,飲多杯水都唔敢⋯⋯

02 | 有限度上網

有啲公司會 block 咗某啲網站,好似facebook、YouTube咁,怕你掛住上網疏忽職守。咁都係啱嘅,你臨瞓前睇 facebook 都碌碌下碌成個鐘啦!公司咁多嘢等你做,邊有咁多時間畀你碌先?只不過喺唔睇新聞,齋靠 facebook 了解世界嘅年代,真係好唔方便!(要娛樂,用咩方法都可以,block得幾多?)

dagong2
雖然現時好多人返工都要用facebook,不過大家都唔敢用私人account做公司嘢囉⋯⋯

03 |  遲到要扣錢

聽過有啲公司 policy 係遲到 1 分鐘扣 1 蚊,如果遲到理由唔合理,責任制嚟講,扣錢都好正常。有啲朋友住新界西,朝朝要過海返工,已經預 2個鐘頭搭車,但都撞正巴士塞車、港鐵延誤,咁老細又點睇?

港鐵頻頻失誤,條條線都有「結界」,真係激死人!
港鐵頻頻失誤,條條線都有「結界」,真係激死人!

04 |  放工或放假都要即刻覆 message

呢點相信大家都唔會陌生,有網友仲話加入咗 WhatsApp group 之後就冇咗放工時間。入得 WhatsApp group ,即係你同老細嘅距離拉近咗啦!咁佢諗到新 idea,想你「幫手」跟跟,你冇理由托手踭!你唔應機?老細第 2 日就問你:「我見你 online, 做乜扮睇我唔到?」

05 | 老細建議你放棄興趣,將工作放喺第 1 位

一心唔能夠二用,放咁多時間行街睇戲畫畫唱歌做手工,不如趁後生專心工作先!就咁聽好似好有道理喎!但星期一至日都對住公司嘢,除非你極鍾意你份工,如果唔係有乜可能唔崩潰?

迫你對工作顯忠誠,簡直邪教一樣!

06 | 指定衣著打扮

要畀個好印象服務客人,專業啲斯文啲無可厚非。但點解唔使見客都規定要化濃妝、唔畀著波鞋?又或者著西裝點解一定要著埋外套?想大家統一衣著打扮,點解唔整套制服就算?

07 |  返工時間要熄電話

原因都係想大家工作期間不受影響啦!雖則員工們都唔希望有咩突發嘢要聽電話,但意外嘅嘢話唔埋,萬一有乜事邊個負責?係咪老細你負責呀?唔係唔係,sorry,我自己負責番。

08 | 唔准布置工作枱

打工仔 留喺公司嘅時間仲多過喺屋企,想布置下等自己返工開心啲?老細就覺得整齊好重要,工作枱最好連 memo 紙都冇,乖乖哋放工嗰陣擺番晒啲水杯日曆入櫃桶啦!

09 | 唔畀傾偈

一個安靜嘅環境先可以令員工專心完成手頭工作(好似係),所以最好就唔好傾偈啦!你會話:「老細,傾公事咋!」冇㗎,老細分唔到公私事㗎,分到佢就唔會用私人時間搵你做公務啦係咪咁講啊?

10 | 明明個個都係香港人,內部 e-mail 都唔畀用中文

咩呀!香港國際大都會嚟㗎!我哋又係國際公司,畀機會員工多啲用英文有乜唔啱?啱嘅,但老細我嘅母語始終唔係英文,你唔介意我用些少 Konglish 或者會錯 grammar 就得㗎喇!

470-page-95
source: http://www.popd.hk/

11 | 要不定期同上司一齊食飯,了解工作進度

呃⋯⋯老細食件雞吖,個 project 而家呢就咁咁咁。(嘩,齋諗到個畫面都已經好尷尬!)

12 | 開會一定要最少講一次嘢

「我同意 B 同事嘅講法。同事 A 你覺得呢?」其實例會邊有咁多嘢報告?!經歷完公開考試都仲有小組討論環節,好崩潰啊!

13 | 喺公司範圍唔畀講粗口

可能就要睇你做邊行喇!做傳媒行業呢就點都有幾句傍身,聽聞做教育版嘅同行因為成日要同校長、學者等人見面,所以1句粗口都唔講得,一講即炒。

dagong14

14 | 彩色影印(就算只得一張)要老細批准簽咗名先畀印

小公司資源有限,適當地節流好正常。但一張彩色影印都要問准老細,似乎就煩咗啲。老細日理萬機,等佢簽名分分鐘等到2046,小員工可以點?一係唔印,一係就屋企印完攞返公司囉⋯⋯

15 | 買公家嘢一定要用現金畀,用八達通或者信用卡就冇得 claim 錢

比較多出現喺教育界,做老師嘅可能會有多啲共鳴。好似話係因為教育局批公帑,所以唔容許電子貨幣交易,費事又要顧埋啲積分咁話。

dagong15

係咪愈睇愈不解?但唔好笑啊,真係有人經歷緊!以上規則可能只係冰山一角,更離譜嘅都有,只係未有人爆出嚟咁解。咁 打工仔 可以點做?試下反映囉!如果反映完都冇用?唔⋯⋯我都唔知喇,你覺得呢?

網友補充回應:「教育界要帶錢返工!」

文章刊出後,亦有唔少網友補充自己遇過的離譜狀況,你又有冇遇過呢?!

有網友表示「公司唔畀著短裙」,亦有網友認為「老屎忽」氣燄最難頂。

相關文章:「公司同事搶假期,係一場關係決裂嘅戰爭!

有教育界表示「買公家嘢唔畀用credit card」,成日要自己墊支,幾乎要帶錢返工一樣⋯⋯