近排睇到有人係龍鼓灘影日落,就先去探下路,但都真係好入,如果係九龍港島剩係入黎睇日落就唔太建議。首先,搭車入屯門西鐵站之後係C出口直落樓下巴士總站轉K52(8達通免費接駁),總站落車就係,但程免費車都要搭45分鐘,所以要預時間。如果住屯門可以直接去蝴蝶輕鐵站再轉車。簡單黎講,龍鼓灘只係一個有幾百米長沙灘,但由於無救生員,更衣室,所以去游水都幾麻煩。旁邊有幾間燒烤場,如果係度燒野食睇埋日落都唔錯。之前仲有個小型賽車場,不過有個女仔D頭髮被夾而發生意外,所以已經暫停左營運。所以今次只係去上山睇下個觀景臺位置,係總站落車之後,行過對面紅綠燈,然後再行落車路就會見到指示牌(個BBQ場放晒燒烤爐係條車路度)


再行五分鐘就到上山位。


一條路上,十分鐘應該到。

左邊會見到龍鼓灘同青山發電廠。


中間小路全部去山墳,不建議走埋去。山頂就係呢個景,其實呢個係中華白海豚暸望台,但真係咩設施都無,都唔知點睇海豚,如果真係有心搞係味都整番兩台望遠鏡,簡介下點睇先易D睇到白海豚……..我上到黎,見到咁樣,都唔知點睇…

個灘其實好淺,坐係BBQ海景位就有呢個景。

因為太熱,而且仲有三個鐘先日落,所以無等到就走,其實我返屋企都算近,有時諗如果住龍鼓灘都幾慘。