集郵空姐好多朋友都計劃嚟緊暑假旺季出埠,不過話明係旺季,每日機場都超過 100 班航班升降,通常都好容易出問題,延誤事小,飛唔到就事大!事關 航班取消 ,表面上大多數是天氣不佳,但實情係當中尚有好多騎呢原因,令航班不能起飛!

以下喺自己 operate 嘅機或者係聽返嚟嘅 case,原來導致航班取消的背後竟然包括……

01 | 起飛與否 機長大晒

轉機時間,好多機組人員都會出吓閘,舒展舒展,順道刺激經濟買下嘢。有次英籍機長「濕平」完,上咗機,先發覺唔見咗副 Ray-Ban,發晒老脾,要機勤搵,搵唔到話唔開機!吓?家陣你係 Sam 哥呀?幾萬呎都要帶超 Chok 住飛,畀雀睇咩!可憐我個地勤朋友要走遍全個T1,最終好彩喺 Duty free 搵番囉。

航班取消 真正內幕
圖片來源:《衝上雲霄》

機長掌握航班生殺大權,所以只要講得掂佢,唔飛就唔飛。好似某廉航,空姐大部份都係即日來回,有次唔知係太攰定係連媽佛 Final Sale,佢哋話好想留喺香港,機長又 Buy 喎,結果班機真係取消咗!

02 | 機組人員on duty 時間爆 limit

我哋行內有法定規定,由 report 果刻起計時,如果飛行途中無 crew rest,當日 duty 其實最盡只可以番 12 粒鐘,不過,好多時都會超過 12 個鐘,因為機長有權再叫我哋飛多 1-2 小時。內地機 Delay 多過食生菜,上月我有班飛上海,已經 Delay 咗 4 個鐘(好彩未上客,唔使玩困獸鬥!);終於等到走得,仲唔拿拿聲叫晒啲客番嚟咩!Call 客 Boarding,但因為上海 Terminal 大,再加上啲客散落喺唔同地方,地勤想捉都捉唔番乘客!終於搵齊人喇,當日嘅呀姐就話,就算好順利,啲客好乖好聽話咁合作,好快起飛走到,我哋當日嘅 duty 會超時,所以我哋唔可以 operate 班機番去,要 position (即係做客)番去。結果班機當然又係取消,一機百人等咗半日,上咗機都唔走得!

不過其實其餘大部份時間,我哋機組人員都經常為咗唔會 Delay 而捱義氣,我有朋友以前做果間航空公司,因為無錢畀清潔公司,搞到無人執拾,為了唔好延誤,全機上下空姐同機長都要執垃圾、洗廁所,最後先可準時起飛。

03 | 飛機壞零件 機長肯飛你都唔好搭

10950483_707209609397647_457849280_n
圖片來源:網上圖片

另外有好多時候,你見個天,明明天氣超好,冇理由會delay啦掛?點知,又莫名其妙咁係候機室度呆等,問地勤,地勤一係唔答,一係唔知咩事。除咗上述兩種原因,第三種就可能會係飛機有零件失靈、故障等,需要當地嘅Engineer即刻補救,時間幾耐則是視乎番壞嘅情度等。唔好彩嘅,分分鐘搞到航班取消!有一次飛曼谷,原來係普通嘅turnaround,即日來回嚟嘅,我仲約咗人收工去食宵架嘛!點知,一覺唔覺意,唔知班機邊個咁黑腳,班機飛到過去又會無啦啦壞機,Engineer哥哥整咗 2 個鐘都整唔番,我哋又要exceed duty,最後又係飛唔成!