6月22日係周星馳的生日,星爺年紀大,fans都唔再後生。隨着年齡嘅增長,我們曾經以為是「理所當然、人所共知」的周星馳電影對白,竟然也漸漸成為「代溝」的標記!為了填補這個文化斷層、改變社會風氣、提高年輕人嘅內涵,今次精選幾句經典對白的「生活應用實例」,希望笑點不至於失傳。

圖片來源:電影截圖

1. 當你需要向老細澄清自己嘅工作性質

「七孔流血還七孔流血、死還死,兩樣嘢嚟嘅,千祈唔好混淆!」-- 《回魂夜》(1995)

(圖片來源:《回魂夜》)
(圖片來源:《回魂夜》)

對於打工仔而言,接order做事,最緊要係指令清晰。「七孔流血還七孔流血、死還死」,點去定義個job 總有一個客觀標準,最驚老細講到一口泡,含糊其辭將任務混為一談,結果乜都要做晒,咁就真係九條命都唔夠死咯!

2. 當你老細諗埋啲無謂嘅新project

「頭嘅嘢,唔係人哋剪,你就『發姣發登』走去剪,要襯㗎!」-- 《算死草(1997)》

大家都記得「彌敦道九號」=「好出事的髮型」,但係追溯劇情來龍去脈,故事的教訓係錯在「人做你又做」+「發姣發登」⋯⋯唔顧身世結果就出事啦!作為打工仔,好多時都係想跟星爺一樣,問阿歡哥一句:「到底你想點先得㗎?」

3. 當你同事愈幫愈忙

「朱茜,你究竟喺度搞乜嘢傢伙呀?」-- 《唐伯虎點秋香(1993)》

(圖片來源:《唐伯虎點秋香(1993)》)
(圖片來源:《唐伯虎點秋香(1993)》)

面對豬隊友,除了埋怨,有時真係忍唔住想問佢搞邊科,到最後搞出大頭佛時,也可以直接引述這一幕的壓軸台詞:「小喇叭,朱茜你係咪想玩嘢呀?」(編按:請注意,不要花太多時間與朱茜糾纏,好快你將會死於「書生奪命劍」之下。)

4. 當你的工作夥伴心不在焉

「精神啲!臨時演員都係演員嚟!」-- 《喜劇之王(1999)》

(圖片來源:《喜劇之王(1999)》)
(圖片來源:《喜劇之王(1999)》)

反正同事之間都明白,大家在老細眼中都是「死咖喱啡」,心神散渙時,拿出這句台詞互相提醒調侃,都幾身心舒暢㗎!

5. 當你想鼓勵同事

「就算係一條底褲一張廁紙,都有佢嘅作用。」-- 《國產凌凌漆(1994)》

禮尚往來,如果你係「被鼓勵」的同事,喺呢個moment,記得講番句「呢個比喻真係一流」作回應,這樣才符合辦公室禮儀啊!

6. 當你被同事稱讚

「唔通我學過如來神掌又要話你知咩⋯⋯」-- 《功夫(2004)》

(圖片來源:《功夫》)
(圖片來源:《功夫》)

而作為旁觀的下屬,遇見部門主管之間的客套奉承,可以講一句:「爭咩吖,撈埋嚟做個瀨尿牛丸吖笨!」

7. 當你對老細忍無可忍時

「我要殺死丁力個X街!!」-- 《上海灘賭聖(1991)》

當然啦,講嘅時候記得睇睇背後有冇人,因為每逢你詛咒老細,又或者講佢是非時,都要做好心理準備,正如《食神》都有講:「你大鑊喇,方丈份人好小氣㗎!」

「你大鑊喇,方丈份人好小氣㗎!」(圖片來源:《食神》)
「你大鑊喇,方丈份人好小氣㗎!」(圖片來源:《食神》)

8. 當你發現公司連續第N年冇人工加:

「逝去感情如何留得住,半點癡情遺忘殊不易,更多悽悽慘慘的遭遇,我不知道⋯⋯」-- 《賭俠(1991)》

當你要求加人工時,而你的老闆懶風趣地自詡係周星馳迷,好可能得到以下胡亂引用回應:「做咩呀﹖你愛呀﹖你愛要出聲先得呀,你愛我畀你,你唔愛我當然唔會畀你啦!」

咁到時你用個水壺掟佢就得㗎喇⋯⋯

忠實fans:對白唔可以亂用,否則係侮辱緊周星馳!

近年由兩位 90後女生成立的網上專頁史提芬周,是正宗周星馳死忠fans,曾在訪問中表示星爺是「哲學家」,喜歡的程度甚至創作手繪製作iPhone 、tote bag等,誓要「改變社會風氣、風靡萬千少男少女、刺激電影市道、提高年輕人內涵」⋯⋯筆者曾趁周星馳生日,邀請她們發表一下感想:

Q1. 你哋有咩想同偶像講?
A: 你個人老咗啫,精神永遠都會喺番度。

Q2.其實想知道,與你們同年的朋友們,是否完全理解周星馳電影的笑話呢?
A: 沒問題啊!因為我只會挑明白周星馳笑話的人當朋友。

stephen_chow_iPhone2
「玉面雙飛龍」⋯⋯你又認唔認得係嚟自邊一齣戲的造型呢?(圖片來源:[email protected]史提芬周)

ctifunchow_iphone
用自己方法 將「名場面」重現。(圖片來源:[email protected]史提芬周)