雖然台中以逢甲夜市最熱鬧，但嗰度真係好迫囉！同大家推介室內的  大里 夜市 ，開幕約一年，人流比逢甲少，但食物選擇算多，有約300攤檔，部分逢甲的人氣店更會在此開分店，來這裡掃到好西又冇咁迫！況且夏天台灣頻頻落雨，有瓦遮頭就唔使怕啦！場內還有個「5星級冷氣廁所」，比一般夜市乾淨企理。離台中車站只需15分鐘車程，好方便。以下嚴選7款口碑美食，去前必讀！

1. 豬肉燒NT35/HK$8

台灣電視台介紹過的人氣燒餅，餅皮即叫即炸，勁香脆，塗上甜醬油再包上煎蛋、豬扒加蔥花，鹹香又飽肚！另有泡菜、牛肉、芝士等10款口味。

店名：半月燒餡餅專賣店
位置：倫敦街

 

2.紫砂迷情、相思債NT39/HK$9

健康糖水系列，個名懶有詩意，其實是紫米紅豆沙和薏仁小米粥，號稱能養顏美白，減低夜市罪惡感！日日新鮮製作，紫米、薏仁等煲得夠軟身，更可自行選擇冷熱和甜度。

店名：長生樹
位置：雪梨街

3.龍蝦沙律玉子燒 NT65/HK$15

來自逢甲夜市，玉子燒足有5cm厚，口感綿密，龍蝦沙律味最貴，鹹鹹哋同微甜玉子好夾。另有明太子泡菜、粟米吞拿魚和蟹柳味。老闆手勢熟練，整一份只需3分鐘！

 

4.蟹肉玉子燒NT60/HK$14

有3大條蟹柳，足料！

店名：熊本町玉子燒
位置：國際街

5. 豆乳雞腿塊 NT60/HK$14

用豆漿代替麵粉來炸雞，肉質嫩滑好香豆味，冇一般炸雞咁油膩，可按個人口味自行放椒鹽辣粉。圖中是冇骨雞塊，雖非即炸但仍外脆內軟，另有雞翅、三角骨、雞爪等可選。

店名：黎品豆乳雞
位置：上海街

6. 肉粽 NT45/HK$10

比香港的粽多了大量香濃芡汁，裡面更有大大嚿滷肉、栗子、花生等餡，傳統台灣美食。

7. 蝦仁肉圓 NT55/HK$13

一份3粒，似巨型餃子，滑溜外皮包著大量彈牙蝦肉，點上芡汁好惹味。

店名：5路清蒸蝦仁肉圓
位置：大里街

8. 愛玉檸檬加粉圓NT45/HK$10

冰凍檸檬啫喱汁，酸咪咪好開胃，可去一去油膩再戰炸雞！

店名：顏記手工粉圓
位置：東京街

 

Info.
大里國際觀光夜市
營業時間：周三至日 5:00pm-11:30pm
地址：台中市大里區中興路二段478號
交通：從台中火車站乘的士15分鐘