去旅行最唔想遇到嘅,係同女朋友鬧交……我哋兩個都係心急之人,試過好多次 去旅行鬧交 ,原因有好多,唔係怪責對方,只係好忟自己而令脾氣變差。每次鬧交,成個旅程嘅興奮心情就會蕩然無存,好鬼掃興。

兩年前一次喺澳洲工作假期發生嘅親身經歷,令我同女朋友都唔會再因為小小事而發脾氣。

話說,當時我哋喺澳洲修成正果,賺夠旅費環澳。之前因為工作方便買咗架車,原本計劃打算由澳洲西邊嘅柏斯,沿住下路一直去到凱恩斯,最後一站去烏魯魯,回程返柏斯賣車再回港。

起初過程尚算順利,最辛苦係七日唔沖涼,晚晚瞓車被蚊狂咬嘅痛苦。最後成功邊行邊玩嚟到凱恩斯,但人算不如天算,架車竟然喺呢個時候壞咗。

仲記得,當日報咗個激流泛舟嘅團,活動場地係山腰一個近河流嘅郊區,去程都相安無事,當活動完結之後,團友各自揸車離開,我哋先發現架車死火,連引擎都開唔著。

我對於修車嘅認識,只限於「打開車頭蓋望兩眼」嘅程度,就等如電腦有咩事,直接重新開機當冇事發生一樣。於是我即刻向未離開嘅團友求救,用半桶水嘅英文解釋狀況,本來激流嘅教練係跟其他教練坐同一架車離開,但佢竟然決定留低,幫我哋整番好架車之後,先坐我哋架車離開。

當時我問佢:「如果整唔番點算?」(英文)

佢一臉輕鬆咁話:「實會有辦法嘅~」(英文)

我心諗……吓!係咪黐線呀?邊有人幫人幫到咁?

教練睇過架車,話應該係架車冇晒電,只要向其他車借電撻番著個引擎,架車就會一邊行一邊自動叉番滿電。但由於周圍都係荒山野嶺,根本冇其他人可以幫到手,教練就帶我哋去附近嘅露營營地,周圍問人借電。

好好彩,去到營地有好心人願意借電,佢開車載番我哋由營地去架壞車嘅位置,我當時喺度諗,如果呢件事發生喺香港,有冇人會願意幫我?有幾多人願意,載幾個陌生人,去一個聲稱係壞車嘅地點?

最後,我哋架車成功叉番電,開番著引擎,載番教練落番山,沿途一直say thank you。教練仲認叻話:「哈哈,我都話實有辦法。」我當刻真係好佩服佢有呢種樂觀嘅性格。落到山腳嘅活動中心放低教練,我同女朋友就繼續開車返酒店。

以為今次有驚無險,點知架車開到中途再次死火!今次仲要停咗喺路中心……

老老實實,遇到呢個情況,除咗打死火燈之外,我真係唔知仲可以點做。

就喺呢個絕望無助嘅時候,有架車停咗喺路邊,司機係一個中年女人,佢建議我哋要將架車推埋馬路外面嘅草地先。講完呢句,就二話不說幫我手推車……

喺推車嘅途中,其他人見狀都走埋嚟幫手,有一個駕駛電單車嘅年輕人、一個西裝男人同佢女伴……

將架車推埋路邊草地之後,有人話試下再叉多次電,西裝男因為要趕飛機,所以畀低咗張修車師傅嘅卡片我,話有咩事可以打呢個電話,師傅會直接揸車嚟我個位置幫部車急救。

最後大家都一致決定,因為怕架車再次喺路中心死火,只好叉一次電,將架車駛去可以正常停泊嘅位置再作打算。但問題又嚟喇……

我哋冇人有借電用嘅電線!!

中年女人話唔使擔心,然後開始同我哋一齊企喺路邊,四周圍向其他車嘅司機借條電線。大約五分鐘之後,終於借到條電線,架車再次撻番著,將架車駛咗埋路邊。我哋不斷咁多謝個中年女人,佢講咗句 good luck 就離開咗。

而最後架車經過師傅檢查,原來係叉電裝置壞咗,就算換電池都冇用,亦因為維修費實在太貴,我同女朋友決定賣咗架車,無奈之下完結呢次環澳之旅。

雖然打破咗原先嘅環澳計劃,去唔到烏魯魯睇世界中心嘅肚臍,但係我同女朋友覺得好滿足,一啲遺憾嘅感覺都冇,因為若果將來要去嘅,一定搵到機會去。

呢次壞車經歷,可能一生人都冇機會遇到。自從嗰次之後,我同女朋友遇到咩困難,都會記起教練嘅一句「總會有辦法」,亦都會盡量去幫身邊嘅人。

可能我哋接受咗好多句「good luck」,教練、中年女人、年輕人、西裝男……所以我冇埋怨過壞車而令旅程中斷,亦冇埋怨壞車而蝕咗一筆錢。相反,我會慶幸自己「好彩」遇到教練、「好彩」落到山腳、「好彩」到環澳尾聲先壞車、「好彩」冇發生意外……

賣完車嗰晚,我同女友食咗一餐「慶祝」飯,我哋承諾以後遇到咩困難,都要兩個人齊心協力搞掂佢,唔好郁啲就鬧交,因為,我好慶幸無論發生咩事,身邊都仲有佢。


專頁:http://www.facebook.com/BlueGodZi
Ig:BlueGodZi