「橙仔,你覺得我有冇肥到?」女朋友突然問我。喂大佬啊!死人都答冇啦,唔驚人頭不保咩!
「冇啊,同以前差唔多啫,不過……」當我想講,不過都可以做下運動,健美啲又結實啲,點知女朋友就打斷咗我。

「喲呵~食咁多嘢都冇肥到!可以繼續食!」

「……」

前排我同女朋友小豆,另加一對情侶,兩pairs人去韓國旅行。今次主要想講嘅係另一對情侶,佢哋今次旅程就唔太開心,因為個男仔由細到大都唔食牛,又唔食得辣……
但偏偏佢女朋友係愛辣之人,仲話今次誓要試到韓牛不可!

「今次難得有人陪我食韓牛,我唔會就你喇~」佢女朋友未出發前就已經咁講。
「好好好……」

去到韓國,瘋狂購物係必然嘅事,亦都係女人嘅專利。而我同佢男朋友,全日大部分時間就係跟住尾,成隻駝獸咁幫手攞嘢,去coffee shop坐低休息,每隔一粒鐘,兩位女朋友就會好似馬拉松選手咁,攞住幾袋戰利品擺低,飲兩啖嘢,去個廁所後繼續作戰。

除咗做足八粒鐘駝獸,呢位男朋友每日幾乎都冇啖好食。
而佢女朋友,就好似放監咁,食佢鍾意食嘅嘢。

「投票!邊個想食辣炒小章魚請舉手!」兩位女王好快就舉咗手。
佢男朋友好無助咁望住我……
「其實呢……我都好想食辣炒小章魚啊……」我都舉起手。
「你背叛我!」男朋友幾乎崩潰。

而另一晚,我哋一行四人去咗馬場洞一嘗韓牛滋味。我哋之前上網搵咗間餐廳嘅位置,要經過一個專賣韓牛嘅市場先可以到達。佢男朋友沿途塊面已經青晒,因為個市場好大陣生牛肉嘅脂肪味……

「嘩!好香牛味啊!」每次呢位女朋友經過都咁講。
「我想嘔……」男朋友捂住個鼻。

入到餐廳一坐低,男朋友睜大雙眼,連呼吸都唔敢太大力,佢見到啲韓牛,好似魚生刺身船咁被侍應托嚟托去。當佢見到隔籬枱,夾起嚿100%生嘅牛柏葉同牛肝擺入口,佢二度崩潰!

最後,佢只係叫咗一個大醬湯同白飯……食到中途,佢女朋友夾咗一嚿韓牛畀佢:「難得嚟到試下啦,同香港嗰啲完全唔同!好好食呀!」

「我怕腥啊……」男朋友喊晒口咁話。
「唔腥!好鮮味呀!入口即溶啊!食啦!」

結果,佢鼓起勇氣擺入口,唔夠一秒就吐番出嚟大叫:「嘩!好臭啊!」
男朋友呢一句,幾乎全場香港遊客都擰轉頭望住佢……
氣氛相當尷尬……

「佢話啲牛好瘦啊~又唔韌喎~哈哈~正!」佢女朋友即刻補鑊,但佢男朋友已經彎低身喺枱底扣緊喉。

情侶之間其實鍾意食嘅嘢要夾得嚟,都係一種上天恩賜嘅緣分嚟。女朋友驚玩機動遊戲可以唔玩、驚睇鬼片可以唔睇、唔識游水可以自己一個人游……

但每日都要食飯,仲要撞正去旅行,難得有機會想試新嘢就好難避免囉……

剩係食辣同唔食辣,已經兩個世界觀啦係咪先?


 

fb專頁:http://www.facebook.com/BlueGodZi
Ig:BlueGodZi