陳曉華馬貫東上演驚險搶屍
昨晚劇情講到，陳曉華飾演的芷昕懷疑案件另有內情，在未獲上司韋家雄批准下，竟與馬貫東（飾高俊）一同飆車趕赴火葬場，務求阻止死者遺體被火化。就在靈柩緩緩下降，即將進入火爐的千鈞一髮之際，二人終於在最後關頭成功撳掣制止，上演一幕生死時速，緊張刺激的節奏令觀眾睇到膽戰心驚，同時亦為之後與上司的衝突埋下伏線。
韋家雄「口硬心軟」連環炮轟陳曉華
陳曉華擅自行動後，韋家雄在解剖室將她罵得狗血淋頭，一輪嘴狂鬧：「我唔係老馮聽你電話㗎，我都唔知你嗰啲咩質疑嚟嘅？你呢啲咩理據嚟嘅呢？你仲夠膽同高俊去火場搶條屍返嚟？呢啲係不顧後果嘅行為！」他更直斥如果判斷錯誤，將會連累整個團隊被問責：「如果質疑係錯呢？如果化驗報告唔係你所諗咁樣呢？你會畀人問責」、「唔怕就冇問題啦，但你會令到我有問題吖嘛，你會令到高俊有問題吖嘛，令到有關嘅人士都有問題吖嘛！」句句鏗鏘有力，盡顯上司的威嚴和對後果的擔憂。
網民洗版式激讚：打敗99%上司
雖然韋家雄表面上嚴厲斥責，但他最終依然尊重下屬的想法，批准再次解剖，更在殮房顧問醫生面前為陳曉華講好說話，全力維護下屬。這種肯為下屬承擔責任的「真．好上司」行為，令網民大為感動，紛紛留言洗版式激讚，認為現實中極難遇到。「敢幫下屬兜底，他已經打敗 99%職場裏的上司，何況是這麼大的事」、「能信任下屬的上司非常難得」、「鬧你就係想你好，鬧完仲會幫你，呢啲上司去邊度搵？」、「用人不疑算這種。」
