近日內地一名31歲夜更保安成為網絡熱話，他不但曾經歷生意失敗、慘遭網戀詐騙過百萬人民幣，當值期間更被路人當作「反面教材」無情奚落。面對種種人生低谷，這位看似平凡的保安員並沒有放棄自己，其真實學歷與最新動向曝光後瞬間令全網倒抽一口涼氣。
名校畢業生慘陷網戀騙局搞到傾家蕩產
呢位名叫楊霄嘅31歲青年其實本身已經係中央美術學院本科畢業生，當初為咗兌現對前女友嘅承諾以及追尋自己從小到大入讀清華大學嘅夢想，毅然決定喺瀋陽經營畫室期間一邊備戰考研。點知頭兩次考試連番受挫導致感情破裂，第三年仲慘遇網戀詐騙，短短一年內被對方以各種悲慘藉口呃走超過一百萬人民幣。事件最終鬧上法庭，但佢嘅畫室已經面臨倒閉危機，仲要靠母親幫手還卡數，人生瞬間跌落谷底。為咗搵生活費兼方便日間去課室旁聽，佢最終決定入職清華大學做晚十朝八夜間保安。
著制服當值無辜受辱惹大批網民怒轟
事件曝光後大批網民替事主不值，紛紛喺各大討論區留言洗版。事關楊霄喺清華大學做夜更保安期間，曾經有一位家長帶住小朋友經過，竟然當面指住佢狂踩：「你不學習，以後就像他一樣。」面對極大身分落差同埋無情嘲諷，群眾鬧爆涉事家長「狗眼看人低」，直斥「真係痴X線，點教仔㗎」、「人哋分分鐘學歷高過 you」。不過楊霄無被冷言冷語擊倒，反而喺保安工作中學識尊重基層勞動者，仲把握喺留學生公寓當值嘅機會狂練英文，心態之強大令群眾深感佩服。
歷經八年苦讀強勢逆襲劍指國際頂級學府
皇天不負有心人，楊霄將報考方向轉為「非遺與數字化創新」專業後，靠住極度節儉嘅生活瘋狂閱讀學術著作同埋參加研討會自修。歷經整整八年合共八次嘗試，佢近日終於以三百八十八分、高出分數線三十四分嘅超強姿態獲清華大學美術學院正式取錄！呢位從不氣餒嘅「科研保安」目前正準備緊研究生課程，同時極力自修英文應付外國語文考試，更揚言下一個人生目標係直接申請哈佛大學全額獎學金博士課程，誓要將中國傳統文化帶上國際舞台，堪稱人生勝利組大反擊。
