暗訪工廠全場唔見一個鮮果只有濃縮漿同水
內地記者前往河南多家果汁代工廠實地暗訪，發現生產車間內完全見唔到新鮮水果原料，亦無任何鮮榨設備，所謂「NFC非濃縮還原果汁」實際上全部以水加濃縮果汁原漿調配而成。廠方人員更直認不諱，表示低價產品根本冇可能用新鮮水果現榨。為咗令產品睇落更似鮮榨果汁，部分廠商刻意喺包裝上玩文字遊戲——將「100%」、「NFC」等字眼放到最當眼位置，同時將「含」字縮到極細，令消費者誤以為係百分百鮮榨。被點名嘅河南愛杞棗食品有限公司，今年4月已遭法院強制執行41.95萬元人民幣，6月更被列為失信被執行人並限制高消費，劣跡斑斑。
網民鬧爆品牌當消費者係水魚紛營要求退款
事件曝光後，大批網民替消費者不值，群組即時洗版。有網民翻查北冰洋一款標榜「添加NFC葡萄汁」嘅產品，發現配料表列明NFC葡萄汁含量僅得0.005%，換算每盒約得0.00625毫升，連一滴水嘅容量都唔到，直斥品牌「當消費者係水魚」。零食品牌「好想來」同樣中招，旗下葡萄汁、柳橙汁及蘋果汁系列產品，包裝大字寫住「100%果汁」同「NFC非濃縮還原」，但配料表頭兩項竟然係水同濃縮果汁，與消費者認知完全唔同. 網民怒轟：「飲咗咁耐原來飲緊糖水」、「呢啲同詐騙有咩分別」，要求全面下架及退款。
品牌急急腳下架但專家話標示合法灰色地帶仍存在
面對輿論壓力，「好想來」母公司萬辰集團率先表態，承認產品包裝標示容易造成消費者誤解，已將相關商品全面下架，並計劃重新設計包裝避免再產生歧義。北冰洋則回應指產品均通過品質檢驗，標示並無錯誤，不同產品有不同配方比例。飲料創新機構赫瑪實驗室創辦人張彬指出，「NFC」本身並非法規明定嘅食品名稱，而係市場廣泛使用嘅商業行銷概念，只要業者喺標示上揭露相關成分及添加比例，即使以小字標示「添加NFC」，都屬於現行法規允許嘅做法。目前多家涉事企業已停產整改，但部分爭議產品仍然喺線上平台有售，消費者選購果汁時務必細睇配料表，唔好再單靠包裝上嘅大字做判斷。
