女大生牛肉店打兩個月暑期工 離職時老闆突塞利市令收入翻倍

家境普通女大生為賺學費捱高溫烤餅搬重物

張同學去年高考後到無錫探親，順道應徵當地一間鮮湯牛肉店暑期工，約定兩個月薪金為6,000元人民幣。雖然餐飲工作辛苦，但她從第一日起便主動搶住做，洗碗、擦枱、搬貨、高溫環境下烤餅，全部來者不拒. 老闆張磊透露，以往請過不少暑期工，大多做幾日便捱唔住走人，唯獨張同學堅持留到最後。她甚至連店內客人留低嘅空瓶都逐個收集拎去回收，最終賣得30多元，話雖然唔多，但「丟掉也是浪費，能多存一點便是一點」。有次店內準備翌日食材忙到夜晚近10點，張同學仍陪住員工一齊做，更主動叫老闆先去休息。

事件曝光後網民齊讚好老闆好員工雙向奔赴

事件在網上流傳後，大批網民對張同學嘅勤奮態度大表讚賞，認為呢種「眼裏有工作」嘅年輕人買少見少。不少人感慨現今社會好多年輕人返工hea做、搵藉口請假，張同學嘅表現堪稱職場清流。同時亦有網民大讚老闆張磊識人善任，願意用真金白銀肯定員工付出，形容呢段僱傭關係係難得嘅「雙向奔赴」。店內洗碗阿姨更透露，自從張同學去年離開後，一直追問老闆今年佢會唔會再返嚟，可見其人緣極佳。

老闆今年開出萬元底薪加獎金更包食包住

去年張同學離職時，老闆張磊同太太特意請佢食飯，再各自準備一個2,000元利市，連同薪金合共畀咗1萬元。張同學收到時當場感動落淚，完全冇諗過會有額外回報。今年6月底，張磊主動聯絡張同學，開出「先給你1萬元打底，賺得多再加發獎金」嘅條件邀請佢回店，更因為佢今年喺無錫冇住處，額外提供住宿及三餐。張同學已經返到店內開工，每日負責送出數百碗湯粉，甚至有顧客因為喺網上睇到佢嘅故事而專程到店幫襯，向佢打招呼。張同學害羞笑住道謝後，隨即又投入工作，話不論日後從事咩工作，都會繼續全力以赴。