新界熱爆37度｜專家揭屋企有3個隱形熱源 12招零成本即降溫

專家教路補水沖涼冰敷三步曲極速降體溫

身體散熱第一步並非狂飲凍水，專家強調水溫根本不是關鍵，因為液體入肚後會被身體加熱，真正重要是維持充足水分讓汗腺正常運作。想進一步感受冰涼效果，可以用含薄荷精油嘅番梘沖凍水涼，薄荷醇能夠激活大腦冷感受體，向全身發出「好凍」嘅訊號，體感溫度即時下降。另外將冰毛巾或冰袋敷喺手腕同頸部脈搏位置，冷感可以透過血液循環迅速傳遍全身，達到急速降溫效果。至於食雪糕消暑，專家警告切忌攝取過量糖分，因為糖分會加速新陳代謝，反而令身體內部更加燥熱。

日間拉窗簾配合風扇對流將室內熱氣逼走

家居方面，專家建議日間必須拉上窗簾或百葉窗，阻擋陽光直射入屋令室溫急升。冷氣溫度應維持21°C以上，調得太低並不會令房間更快變涼，反而令壓縮機無休止運作，電費暴漲。一個被大部分人忽略嘅技巧，就是將風扇面朝窗外擺放，將室內熱空氣吹走，同時引入室外涼風形成對流效果. 清晨或傍晚室外氣溫較低時，打開房屋兩側窗戶更能製造高效對流風。而日間無人使用嘅房間應該關門，將冷氣集中鎖定喺有人活動嘅區域。

頭頂燈膽同床單竟然係令你瞓唔着嘅元兇

最容易被忽略嘅升溫元兇其實就喺頭頂——傳統白熾燈運作時產生嘅熱量遠高於LED燈，專家建議逐步更換成LED燈膽，尤其係經常坐住嘅位置，降溫效果會相當明顯。廚房煮飯產生大量熱氣，浴室洗澡後充滿熱蒸氣，兩處都應該開啟抽氣扇第一時間將熱能抽離. 焗爐同明火煮食會令全屋溫度急升，改用電磁爐或者喺涼爽嘅早晨提前煮飯都係可行方案。最後一個令人意想不到嘅隱形熱源就係床單——高針數床品編織緊密容易悶熱，換上低針數純棉床單被鋪，編織較鬆散透氣度更高，夏天瞓覺終於唔使焗住成身汗。