Calbee薯片包裝突變黑白 背後原因竟同中東戰爭有關

伊朗戰爭波及荷姆茲海峽航運觸發缺墨危機

事件源於伊朗戰爭導致荷姆茲海峽航運受阻，而全球大部分彩色印刷油墨所需嘅關鍵原料「石腦油」正正係經呢條航道運送。供應鏈斷裂之下，Calbee於5月宣佈將多款皇牌產品包裝由彩色改為黑白印刷，包括薄鹽味、法式清湯味、紫菜鹽味薯片，以及蝦條同水果麥片等，一夜之間貨架上嘅包裝全部「褪色」，令唔少赴日掃貨嘅港人以為買到翻版貨。

網民鬧爆黑白包裝似翻版貨認唔到邊款味

事件曝光後，大批網民替Calbee不值之餘，亦紛紛表示黑白包裝實在太難辨認。有網民直言「成個貨架灰濛濛，完全分唔到邊包係咩味」，亦有人話「以為間舖入錯貨」。不過都有網民持相反意見，認為黑白包裝喺一堆花花綠綠嘅零食當中反而更加搶眼，但大多數人都覺得零食本身係一種享樂，包裝無色彩就少咗嗰種歡樂感覺，間接提醒緊大家國際局勢有幾緊張。

蝦條8月3日率先恢復正面彩色印刷

雖然伊朗衝突解決進度緩慢，航運狀況未完全恢復正常，但Calbee決定優先將包裝正面恢復彩色印刷，方便消費者辨識產品口味，背面則繼續維持黑白加少量色彩點綴。蝦條於8月3日率先恢復正面彩色包裝，各款薯片則視乎口味同包裝大小，分別於8月10日或8月24日陸續回復色彩。Calbee表示選擇優先恢復正面係為咗照顧消費者購物習慣，令大家更容易搵到心水口味，算係喺原料短缺之下嘅折衷方案。