每次想食壽司郎都要面對漫長等候，港人為咗食餐好嘢可以去到幾盡？有網民竟然自行開發第三方網站，一鍵即睇全港分店實時排隊狀況，仲內置小遊戲幫你消磨時間，堪稱壽司郎粉絲恩物。

網民自創「Sushi Long」網站免安裝即查排隊情況

這個由港人開發的第三方網站名為「Sushi Long」，最大賣點係網頁版設計，無須下載任何應用程式，用手機、平板或電腦打開即用. 網站涵蓋港九新界各區壽司郎分店，無論堂食定外賣自取，都可以即時顯示最新叫號進度及預計輪候時間. 最貼心嘅功能係輸入自己攞到嘅籌號後，系統即刻計算出所屬組別同預計等候時間，等你可以輕鬆掌握進度，唔使死企喺門口等餐懵，甚至可以先去附近行個街再返嚟。

六色地圖一眼睇清邊間最快有位坐

網站仲隱藏咗一個超實用嘅地圖功能，打開之後全港分店嘅平均輪候時間一目了然. 地圖以六種顏色標示繁忙程度：綠色代表直入、藍色少於30分鐘、黃色30至59分鐘、橙色60至89分鐘、紅色多於90分鐘、灰色則代表未開門或已關門. 揀好心水分店之後，右下角更會顯示詳細地址，並附帶Google Maps連結一按即跳轉導航，對於趕時間又想食壽司嘅人嚟講絕對係救星. 想即刻出發去最少人排隊嗰間，再唔使逐間打電話問。

內置3款壽司主題小遊戲邊等邊玩打發時間

最令人驚喜嘅係開發者竟然喺網站入面收埋彩蛋，點擊「店外實況」就會發現3款以壽司為主題嘅小遊戲，包括「炸蝦逃脫」、「甜蝦2048」同「甜蝦砌圖」，等位嗰陣可以邊玩邊消磨時間，唔使再齋碌手機. 不過要留意，呢個網站純粹提供查詢功能，如果想線上攞籌或者預約，就必須使用壽司郎官方App先做到，兩者配合使用先至最方便。