NIGO操刀打造全球最潮便利店旗艦
為慶祝成立45週年，Family Mart正式啟動「Next Family Mart Project」計劃，首個重頭戲就係7月10日於東京麻布台虎之門開幕嘅「Famima Park Azabudai」旗艦店. 呢間店由日本潮流教父NIGO擔任創意指導，將便利店重新定義為一個融合時裝、美食同生活態度嘅潮流空間。店內設有「Convenience Wear」專區，唔單止有齊各季服飾，仲配備試衣間同觸控穿搭面板，有專人幫你配搭造型，規格直逼快時尚品牌門市！更誇張嘅係，建築物頂層設有「屋頂森林」，為繁忙都市帶嚟一片綠意，加上全新官方吉祥物「F」散落各處，視覺衝擊力十足。戶外仲有「Famima Stand」外帶區，唔使入店都可以歎咖啡同招牌炸雞，配合沿玻璃幕牆而設嘅吧台座位，氛圍感直接拉滿。
冠軍咖啡師聯乘限定商品令人瘋狂朝聖
事件曝光後，大批網民替港人旅日清單又多一站而興奮不已，紛紛表示「呢間嘢根本唔係便利店，係景點！」有人留言大讚：「有試衣間嘅便利店，NIGO真係癲！」、「個屋頂森林打卡一定靚到癲」、「去東京一定要朝聖！」店內咖啡更由2016年世界咖啡沖煮大賽冠軍粕谷哲聯手研發，連外帶杯都充滿街頭潮流設計感，令唔少咖啡控同潮流迷都表示「非去不可」。加上旗艦店限定嘅T恤、不鏽鋼杯等周邊商品，網民直呼「手信清單已爆滿」，認為呢間店將成為東京新一代必去打卡熱點。
開幕限定福利手慢無先到先得
想第一時間感受呢間「未來便利店」嘅朋友要留意喇！旗艦店由7月10日起24小時營運，開幕期間設有兩大福利：頭2,026名消費顧客可獲得開幕紀念貼紙，而消費滿5,000日圓（約HK$270）嘅頭2,000名顧客更可獲贈Famima品牌環保袋。呢間集時裝、美食、打卡同購物於一身嘅旗艦店，絕對唔係普通便利店咁簡單，計劃暑假遊日嘅朋友，記得將「Famima Park Azabudai」加入行程，親身體驗便利店嘅終極進化形態！
