梳化底驚現神秘黑點兩日後急速膨脹　網民一認出即叫屋主快啲掉

黑點兩日內急速變大形似刷子

事主表示，某日無意間瞥見梳化底部出現幾個細小黑點，當時以為只是日常髒污，完全無放在心上。點知僅僅過咗兩日，黑點已經明顯脹大，湊近一睇更加觸目驚心——外形竟然似足一支支黑色迷你刷子，周圍仲散落一層黑色粉末，情況極之詭異。事主隨即將照片上載至網上求助，希望有人能夠解答究竟係咩嘢生物入侵咗佢屋企。

網民一眼認出係髮網菌警告已進入繁殖階段

帖文曝光後，大批網民替事主緊張，有熟悉真菌及黏菌生態嘅網民即刻指出，呢啲並非普通發霉，而係俗稱「髮網菌」嘅黏菌類生物。有人更分析指，梳化底部散落嘅黑色粉末正正就係髮網菌成熟後釋放嘅孢子，代表菌體已經進入繁殖階段，意味梳化內部木質結構好大機會早已受潮，甚至被菌絲覆蓋。不少南方網民亦紛紛留言分享自己屋企傢具、木板甚至牆角喺潮濕天氣下長出霉菌嘅慘痛經歷，有廣東網民笑言終於明白點解老一輩偏愛紅木梳化，認為實木傢具相對較耐潮濕，也較不容易因布面及填充物受潮而滋生黴菌。

屋主得知孢子影響呼吸道即決定棄掉梳化

據了解，髮網菌多數生長於高溫潮濕及腐朽木材表面，近期廣東受高溫及降雨影響，室內濕度長時間偏高，為黏菌提供理想繁殖環境。當孢子大量釋放至空氣中，有機會對呼吸道造成刺激，過敏體質及免疫力較弱人士尤其需要留意。事主得知成因及潛在健康風險後，最終決定將整張梳化丟棄，以免髮網菌繼續喺室內擴散。事件亦提醒市民，高溫潮濕天氣下應保持室內通風乾爽，若發現傢具底部出現異常斑點或粉末，應盡快檢查處理。