港女巴士車頭玩手機突被扣雙倍車資 前車長揭頂閘隱形陷阱

港女企車頭玩手機遇落斜失重心手機秒觸卡機

事主透露當日放工搭巴士，車廂早已迫到水洩不通，唯有企喺車頭八達通收費機前嘅「黃金企位」。巴士駛至屯門公路落斜路段時，車身突然劇烈搖晃，正專心篤手機嘅事主一時企唔穩向前傾，手機隨即觸碰到八達通機，清脆嘅「嘟」一聲響徹車廂. 一程長途車就咁被扣咗雙倍車資，車長即時錯愕回頭問佢「點解要俾多次錢」，場面極度尷尬。

事件曝光大批苦主接力現身爆智能手錶都中招

事件曝光後，大批網民替事主不值之餘，亦紛紛接力現身分享自己嘅慘痛經歷。有網民大爆學生時期因企喺車頭，竟試過一程車被「連嘟三次」，創下悲慘紀錄。另有網民提醒智能手錶同樣係高危陷阱，過西隧時手錶誤觸卡機，多付24元直呼「蝕到入肉」。面對車長嘅錯愕詢問，有網民搞笑獻計，提議霸氣回應「見你揸得幾好，想打賞下你！」以幽默化解尷尬，笑翻一眾網民。

前車長證實頂閘日常並教路退款自救方法

討論吸引巴士業內人士注意，有前車長留言證實呢類事件喺車廂頂閘時極易發生，乘客手機、手錶或掛胸八達通都係高危物品。更有現職巴士公司員工自爆，自己著住制服企喺司機門旁，都試過因巴士收油向前衝而誤嘟咗44元車資，成為同事間嘅笑柄。業內人士提醒，若不幸遇到誤扣車資，應即時記錄巴士路線編號、上車地點、時間及車牌號碼，再聯絡所屬巴士公司顧客服務部登記。經翻查紀錄證實後，可攜同該卡前往「八達通服務站」拍卡領回款項。九巴客服熱線為2745-4466，龍運為2261-2791，城巴則可瀏覽官方網頁查詢退款。