去日本旅行，便利店掃貨已經係港人指定動作！最近日本7-Eleven靜靜雞推出一款越南法包（Bánh Mì），索價430日圓（約23港元），有外媒記者即刻實測試食，結果發現口感同正宗越南法包有明顯落差，但味道竟然有意想不到的驚喜。

7仔越南法包430円登場主打冷藏即食

日本7-Eleven於6月底正式推出這款冷藏預製越南法包，售價430日圓，在各大門市的雪櫃貨架有售。打開包裝，賣相其實唔差——麵包烘得金黃，內裡夾住火腿、切粒紅蘿蔔、蘿蔔絲同少量芫荽，色彩對比鮮明。份量以日本便利店標準嚟講算係合格，唔似某啲日式三文治細細份 “呃秤”。不過由於產品需要冷藏保存，麵包口感偏軟，完全無傳統法包應有的脆皮口感，食落更似普通軟包多過正宗Bánh Mì。另外，芫荽份量亦明顯偏少，估計係為咗遷就日本大眾口味而刻意減量，令成個法包少咗一份標誌性的香草風味。

外媒記者實測後意外大讚蔬菜爽脆甜辣醬調味出色

事件曝光後，外媒SoraNews24記者率先試食並發表評測，結果令人意外！記者指出，雖然麵包偏軟、芫荽唔夠，但蔬菜部分竟然非常爽脆，紅蘿蔔同蘿蔔絲口感紮實，咬落去嗰種清脆感相當突出。蔬菜經過醋漬處理，帶有適度酸味但唔會過於嗆口，配上甜辣醬提供微微辣度，整體調味平衡得唔錯。記者更形容食完之後有飽足感但唔會覺得油膩或太撐，認為呢款法包比起普通火腿芝士三文治或吞拿魚蛋黃醬三文治更加有趣，適合通勤返工返學或者旅行途中快速醫肚。

評價褒貶不一但勝在方便分店梗有一間喺左近

最終結論係，7仔呢款越南法包未必係令人瘋狂追捧的神級出品，但考慮到日本7-Eleven分店密度極高，基本上唔使特登轉車繞路就買到，方便程度絕對係最大賣點。對於平時想食越南法包但又懶得搵專門店的旅客嚟講，430日圓就能買到一份口感紮實、調味有驚喜的快餐選擇，性價比尚算合理。下次遊日經過7仔，不妨順手攞一份試吓，當係旅途中的小驚喜！