丸龜製麵布丁用烏龍麵做 試食者咬一啖發現完全唔係布丁

丸龜製麵研發烏龍麵布丁衝擊視覺味覺

丸龜製麵為咗擴展夏天食烏龍麵嘅可能性，開發出一款前所未見嘅創新甜品——「烏龍麵布丁」（うどんプリン）。製作過程相當講究，先將烏龍麵切碎再揉捏混合，然後以慢火烹煮，最後冷卻令其達到Q彈口感，再加入煉乳同糖調味。產品共推出四款口味，包括蘇打、餡蜜、芒果以及紅豆黃豆粉，其中芒果同紅豆黃豆粉售價為290日圓（約15港元），蘇打同餡蜜則為340日圓（約18港元）。由於每份都係店內手工製作，僅限掛有「うどんプリン」招牌嘅特定門市先有得買，數量極之有限。

媒體試食後大感震驚 口感似麻糬多過布丁

正式開賣前，有媒體獲邀參加預嚐活動，結果試食後直言「從未食過咁嘅甜品」。試食者表示，呢款布丁甜度非常高，口感極度Q彈煙韌，仲可以感受到入面細碎嘅烏龍麵碎片，質地完全唔似傳統布丁，反而更加接近麻糬.由於製作過程完全唔使用雞蛋同牛奶，亦無用明膠，所以口感同一般認知嘅布丁相差甚遠。其中芒果口味被形容為類似東南亞甜品嘅風格，而蘇打口味則帶有清爽夏日感覺，餡蜜口味就加入傳統日式元素，紅豆黃豆粉口味則以大量黃豆粉帶出堅果香氣，食客可以自行灑上黃豆粉增添新鮮感。

烏龍麵做甜品挑戰常識極限值得一試

呢款產品可以話係丸龜製麵繼「搖搖烏龍麵」同「烏龍麵冬甩」之後又一創意之作，將大眾對烏龍麵嘅想像推到極限。雖然口感同傳統布丁完全唔同，但試食者認為作為夏天嘅消暑甜品，呢個獨特體驗絕對值得一試。下次去日本見到有掛「うどんプリン」招牌嘅丸龜製麵門市，不妨挑戰一下自己嘅味覺極限。