《Pokémon Sleep》推出三週年，官方竟然在橫濱商場中央放置一隻巨型瞓覺卡比獸，仲要係真實大小嘅訓覺姿態，配合兩大商場內多隻沉睡中寶可夢等你去搵。呢個為期超過一個月嘅粉絲活動，除咗打卡影相，仲有集章換限量貼紙、巨型扭蛋機同埋遊戲入面飲品實體化，令一眾訓練師已經準備好出發。

巨型卡比獸霸佔商場中央廣場瞓到四腳朝天

橫濱港未來地區將於7月17日至8月23日舉辦「Pokémon Sleeping Faces Research」活動，主場設於Landmark Plaza及對面街嘅Mark Is兩大購物中心。Landmark Plaza中央廣場將設置一隻巨大睡姿卡比獸，成為全場焦點。兩間商場內更佈置多種沉睡中嘅寶可夢角色，等緊大家逐隻去發掘。活動最大賣點之一係集章挑戰，兩間商場合共設有6個印章站（Landmark Plaza 3個、Mark Is 3個），遊客需要集齊所有印章先可以換到限量版《Pokémon Sleep》貼紙，每日數量有限送完即止。遊戲角色橙夢博士（Dr. Neroli）亦會現身印章站，令粉絲更加投入。

扭蛋毛巾加快閃店周邊令訓練師荷包大出血

Landmark Plaza內設有大型扭蛋機，入面放滿《Pokémon Sleep》主題毛巾，每次扭蛋收費2,000日圓（約港幣$100），設計包括卡比獸、草屬性、火屬性及水屬性四款。Mark Is方面則開設快閃商店，發售鎖匙扣、亞克力企牌、襟章、小袋及卡比獸坐墊等周邊精品。同場更設有飲品攤位，將遊戲內道具實體化，包括雜果汁、甜蜜之吻沙冰、手工汽水及早起咖啡啫喱，買任何一杯即送限量角色杯墊（共6款）。最特別嘅係Mark Is 5樓設有由豐田開發嘅Totone午睡艙體驗區，外觀加入精靈球元素，真正做到邊瞓邊玩。

橫濱寶可夢郵筒延長設置可順道一併打卡

活動期間，橫濱地區早前設置嘅寶可夢主題郵筒已確認延長擺放，由於位置鄰近Landmark Plaza，遊客可以輕鬆將兩個景點安排在同一日行程內。活動由7月17日正式開始至8月23日結束，橫跨整個暑假檔期，無論係專程飛去定係暑假旅行順路去都非常方便。鍾意《Pokémon Sleep》嘅玩家記得Mark低日期，呢隻巨型卡比獸只會瞓到8月底就要起身走人。