80歲老婦全身痕半年被當濕疹 醫生揭皮膚底下驚人真相

老婦輾轉求醫半年搽極唔好

台灣皮膚科醫師吳仁欽分享個案,指一名80多歲老婦全身痕癢持續大半年，期間曾向多名醫生求診，每次都被診斷為濕疹，處方藥膏後症狀稍有紓緩，但痕癢很快又捲土重來。老婦一度以為係年紀大皮膚退化所致，直至向吳醫生求診時，吳醫生留意到她手指縫之間有細小紅點，再仔細檢查肚臍周圍、腋下及手腕內側，赫然發現「一排排整整齊齊」嘅紅點。吳醫生確認老婦患上嘅並非濕疹，而係疥蟲寄生於人體表皮角質層引起嘅傳染性皮膚病——疥瘡。疥蟲會鑽入皮膚表層「挖隧道」產卵，引發免疫過敏反應導致劇烈痕癢，而濕疹藥膏只能壓制表面症狀，根本無法殺滅皮膚底下嘅疥蟲，所以病情先會不斷反覆。

高齡患者症狀不典型極易被誤診

吳醫生解釋，疥瘡之所以最容易被誤診，係因為佢「實在太識偽裝」。尤其高齡患者因免疫反應鈍化，皮膚上出現嘅紅疹並不典型，令醫生更難從外觀上辨認出疥瘡特徵，往往當作普通濕疹處理。吳醫生強調，診斷關鍵在於檢查好發部位，包括指縫、手腕、肚臍及腋下，若呢幾個位置同時出現規律排列嘅紅點，就要高度懷疑係疥蟲作祟而非單純濕疹。

飛機維修員腋下爆癢揭另一蟲患元兇

無獨有偶，吳醫生亦分享另一宗蟲患個案。一名在機場停機坪工作嘅飛機維修員，某日突然腋下與鼠蹊部冒出大量奇癢紅疹，癢到幾乎發瘋，起初以為只係出汗引起嘅汗疹。經吳醫生診斷後，證實係禽蟎叮咬造成嘅皮膚炎。原來禽蟎可隨鴿子拍打翅膀時掉落嘅羽毛，甚至順風勢爬入建築結構，直接入侵飛機維修空間。兩宗個案都提醒大眾，當皮膚持續痕癢且治療效果反覆時，切勿輕易接受「濕疹」呢個答案，應主動要求醫生排查蟲患可能性，以免延誤治療。