日本JR西日本皇牌觀光列車「West Express 銀河」宣布今個夏天再度重啟紀伊半島路線，由京都直達新宮，全程包攬夜行體驗、沿海絕景同地道美食。不過想搶飛嘅旅客注意——首航車票已經全數售罄，而整季只得24班往返班次。

京都出發夜行列車途經多個車站食盡地道美食

「West Express 銀河」紀伊半島路線今年踏入第六年營運，將於7月3日至9月30日期間提供24次往返班次。夜行列車晚上從京都出發，翌日早上抵達新宮，沿途安排多個特色停站體驗。列車會在和歌山站停留，讓乘客落車外帶當地人氣和歌山拉麵；到達串本站時更有約一小時停車時間，旅客可以預約限定吞拿魚漢堡套餐，或者乘坐接駁巴士前往橋杭岩奇石群打卡。車廂內亦有地質公園導賞講解及太空產業講座，將南和歌山嘅地區特色一網打盡。

日間班次由大學生志工導覽今年更新增車站紀念章

日間列車從新宮出發返回京都，主打地方互動體驗。車廂內設有共享空間，沿途舉辦地區物產販售、問答遊戲等活動，各停靠車站亦會有當地商戶及觀光團體擺設攤位迎接旅客. 串本站更有當地日土友好吉祥物「MaguToru」現身打招呼。和歌山大學「紀國線活性化計畫」成員會在車上派發特製路線地圖並擔任導覽，為旅程增添人情味。今年更首次增設「West Express 銀河」專屬車站紀念章，沿線各站均可收集，鐵道迷絕對唔可以錯過。

全車預約制票價8670日圓起首航已經秒殺清零

想體驗呢架人氣列車嘅旅客要留意，全車採取預約制，可透過JR西日本網上預約系統「e5489」、綠色窗口或自動售票機購票。票價由標準指定席嘅8,670日圓（約港幣460元）起，至高級私人包廂嘅15,380日圓不等。JR西日本表示，路線結合太平洋海岸景觀、地質公園奇景以及與當地居民嘅深度互動，一直係西日本最具特色嘅觀光鐵道體驗之一。有意出發嘅旅客記得盡早預約，以免向隅。