食完飯即刻叼空碗衝出門！主人好奇跟蹤愛犬 驚揭隔籬屋「加餸」真相

主人大呻愛犬飯後行蹤詭秘 叼空碗直奔隔籬屋

事主史蒂芬妮（Stephanie）喺網上大呻，話自從幾年前搬到丈夫父母隔籬之後，就發現愛犬Buckwheat有個奇怪習慣。每次食完飯，明明個碗已經乾乾淨淨，但Buckwheat總係會熟練咁叼住個空碗衝出門口。日子一耐，史蒂芬妮實在忍唔住好奇心，決定有一日偷偷跟喺後面，睇下佢到底搞邊科。點知一跟，就發現呢隻為食狗仔竟然一路直奔隔籬丈夫父母屋企，目標相當明確！

為食狗仔超自信步伐笑爆網民 群組洗版大讚聰明

事件曝光後，大批網民即刻被Buckwheat嘅醒目樣逗笑，影片喺群組瘋傳洗版！唔少人留言激讚：「狗狗行路個樣超級有自信，睇得出佢已經做咗好多次」、「真係一個聰明嘅小朋友」、「佢咁樣來回行，都當係消耗卡路里啦！」Buckwheat為食嘅執著樣，完全融化咗一眾網民。

真相揭開原來係爺爺接力寵孫 每日上演溫馨第二餐

原來，呢個「加餸」習慣背後有個溫馨故事。史蒂芬妮透露，奶奶在生時係全家最錫Buckwheat嘅人，成日都會額外餵佢食嘢。即使奶奶過身後，老爺依然延續呢個習慣，只要見到Buckwheat叼住飯碗上門，就會自動波幫佢準備額外食物，等佢可以如願食到「第二份晚餐」。呢段人同寵物之間嘅溫馨默契，真係睇到人心都暖埋！