220萬人睇到眼濕濕！金毛犬苦等退休速遞員 結局神展開勁催淚

速遞員老友突然消失狗狗日日望窗勁失落

美國一位狗主「@abbeysgoldenlif」分享，佢屋企隻金毛尋回犬艾比（Abbey）同UPS速遞員艾德（Ed）係超級老友。每次艾德上門派件，艾比都會叼住心愛嘅公仔衝出去迎接，期待同佢玩一陣。點知好景不常，主人某日突然得知艾德已經提早退休，以後都唔會再嚟。但艾比唔知情，依然日復日咁守喺窗邊，由朝等到晚，個樣勁失落，似乎一直等緊佢嘅老朋友再次出現，畫面令人心酸。

主人心痛拍片求助引220萬網民洗版奇蹟出現

眼見愛犬咁樣為「情」所困，主人勁心痛，於是將艾比等待嘅影片放上社交平台，希望借助網絡力量，將艾比嘅思念傳達俾艾德。估唔到影片曝光後瞬間引爆網絡，錄得超過220萬次點擊，大批網民洗版留言，紛紛表示「睇到好心痛」、「狗狗真係好長情」。最令人驚喜嘅係，影片竟然真係傳到艾德本人眼前！佢親自留言話：「我好掛住佢，同埋我所有毛茸茸嘅客戶們，艾比，我哋好快會再見面！」。

結局神展開超催淚老友帶埋接班人交棒延續友情

幾日之後，艾德果然信守承諾，專登返去探艾比！影片見到，艾比一見到思念已久嘅老友，即刻瘋狂搖尾，成隻狗開心到彈起，場面勁溫馨。原以為故事就此圓滿結束，點知仲有更催淚嘅後續！艾德正式退休後，竟然特登帶埋新上任嘅速遞員羅恩（Ron）一齊上門，親自將呢位「接班人」介紹俾艾比識，上演一幕最暖心嘅「職務交接」。而家艾比同新速遞員都做咗朋友，喺艾德嘅安排下，呢段人狗情誼用一個更溫暖嘅方式延續落去，真係睇到人眼眶濕晒！